GŻIRA U……………. 4 RABAT A…………… 0
Gżira: A. Curmi, N. Muscat, Z. Scerri, R. Soares (P. Mambouana 58’), A. Cohen, J. Corbalan, C. Gatt Baldacchino, R. Briffa (C. Sammut 75’), J. Pereira da Silva, T. Veronese, H. Garba (L. Brincat 67’)
Rabat: A. Zammit, I. Micallef (S. Micallef 86’), J. Caruana, N. Attard (E. Goodman 75’), B. Micallef, L. Vella (I. Abela 69’), D. Falzon, K. Muscat, J. Scholey, M. Xerri, Z. Tanti
Imwissija: B. Micallef 30’, Z. Tanti 78’ (R)
Skorjaw: J. Corbalan 37’, 66’, A. Cohen 79’, Z. Scerri 83’ (G)
Referee: Malcolm Spiteri
Assistenti Referees: Alan Camilleri, Paul Apap
Il-mixja ta’ Gżira United biex javvanzaw sal-aħħar stadji tal-FA Trophy bdiet b’rebħa ta’ 4-0 kontra Rabat Ajax. Rebħa li għalkemm tidher kbira, kien fit-tieni taqsima li Gżira serrħu rashom minn xi sorpriża li setgħu jagħmlu r-Rabtin.
Id-differenza bejn il-leaders tal-Kampjonat Premier u tim tat-Tieni Diviżjoni kienet evidenti, anki jekk Gżira ma kellhomx ir-ritmu li normalment jilagħbu bih fil-logħbiet tal-kampjonat.
Il-Maroons fetħu l-iskor fis-37 minuta biż-żagħżugħ JUAN CORBALAN jirċievi, jikkontrolla u jaqbeż avversarju biex għeleb lil Andrew Zammit. Qabel tmiem l-ewwel taqsima Gżira kellhom free-kick li minnu Roderick Briffa għadda lejn Thomas Veronese li l-kross tiegħu qabeż lil Zammit iżda d-difiża Rabtija b’xi mod biegħdet il-periklu.
Fit-tieni taqsima Gżira komplew jattakkaw u fl-54 minuta kien imiss liż-żagħżugħ Niki Muscat li b’xutt mill-bogħod impenja lil Andrew Zammit iżda l-gowlkiper Rabti salva tajjeb. Gżira serrħu ftit rashom f’nofs it-tieni taqsima bit-tieni gowl. Andrew Cohen qassam lejn JUAN CORBALAN u minn qagħda ftit angolata għeleb lil Zammit b’xutt fil-baxx.
It-tim ta’ Darren Abdilla skorja t-tielet gowl fid-79 minuta bi free-kick ta’ ANDREW COHEN viċin il-kaxxa l-kbira. Gżira skorjaw ir-raba’ gowl fit-82 minuta b’Tanti kważi jiskorja fix-xibka tiegħu stess wara passaġġ fil-baxx fil-kaxxa, iżda l-ballun ħabat ma’ sieq il-wieqfa. Madankollu l-midfielder ZACHARY SCERRI kien fil-pożizzjoni t-tajba biex skorja f’lasta vojta.
SAN ĠWANN……. 0 FGURA U………….. 1
San Ġwann: M. Mestrovic, J. Azzopardi, R. Zammit, A. Cachia (N. Abouhaisa 79’), A. Borg, G. Zammit, K. Gatt, C. Gauci, J. Tanti, P. Kanzurov (G. Henshaw 53’), N. Ferreira
Fgura: B. Bartolo, C. Ciantar, J. Bugeja, J. Zammit (J.R. Vella 87’), T. Grech, D. Azzopardi (N. Fava 72’), J. Cassar, A. Scicluna, S. Borg, G. Galea, A. Williams (P. Taylor 52’)
Imwissija: J. Azzopardi 67’, G. Zammit 93’ (S), J. Bugeja 10’, P. Taylor 69’, B. Bartolo 91’ (F)
Skorja: T. Grech 76’ (F)
Referee: Alex Johnson
Assistenti Referees: Mitchell Scerri, Vasil Vasilev
It-tieni tat-Tieni Diviżjoni Fgura United elimina lit-tim tal-Ewwel Diviżjoni San Ġwann b’gowl li wasal fl-aħħar kwarta. Minkejja li jinsabu fil-ħames post f’diviżjoni inferjuri, kollox ma’ kollox Fgura kienu aħjar mill-avversarji tul id-90 minuta.
Fgura ħolqu l-ewwel azzjoni wara kwarta logħob b’passaġġ ta’ William Abeeb lejn Thomas Grech li prova minn barra l-kaxxa iżda t-tentattiv tiegħu għadda ftit għoli. Man-nofs siegħa logħob iż-żewġ plejers ta’ Fgura reġgħu kienu fl-azzjoni, b’Grech iqassam lejn Abeeb iżda l-gowlkiper Mestrovic salva l-konklużjoni.
San Ġwann kważi marru minn fuq qabel tmiem l-ewwel taqsima bi free-kick ta’ Jan Tanti li kien salvat parzjalment minn Brandon Bartolo bil-ballun jaħbat ukoll mal-mimduda.
Fgura fetħu l-iskor b’dak li kellu jkun il-gowl tar-rebħa fis-76 minuta. THOMAS GRECH irċieva ballun fuq ix-xellug, daħal fil-kaxxa u ġibed il-ballun fuq il-lemin biex għeleb lil Mestrovic b’xutt sabiħ għar-rokna minn pożizzjoni ftit angolata.
Fgura saħansitra resqu viċin f’żewġ okkażjonijiet meta fis-86 minuta Nicholas Fava naqas milli jiskorja minn quddiem Metrovic wara azzjoni personali, biex żewġ minuti wara Giovanni Galea naqas li jiskorja mir-rebound wara li Mestrovic salva parzjalment xutt ta’ Fava.
Ta’ dan kienu se jpattu qares għaliex lejn it-tmiem San Ġwann setgħu ġabu d-draw, b’korner li minnu Christian Gauci ra d-daqqa ta’ ras tintemm ftit barra.
