Aktar minn 260 student temmew b’suċċess l-istudji tagħhom fl-Istitut tal-Istudji Turistiċi u ggradwaw waqt ċerimonja li saret nhar it-Tnejn.
Għat-tieni sena konsekuttiva, l-ITS ħareġ ukoll ċertifikat ta’ blockchain għall-gradwati kollha.
Pierre Fenech, CEO tal-ITS iddikjara li huwa ta’ pjaċir li jara lil dawn l-istudenti kollha jiggradwaw u li ħafna minnhom ukoll għażlu li jkomplu l-istudji tagħhom mal-istitut għal din is-sena akkademika attwali. Saħaq li jħeġġiġhom biex ikomplu l-istudji tagħhom f’din l-industrija li qed tikber b’mod kostanti.
Din hija t-tieni sena li fiha l-istudenti kollha mhux biss qed jiksbu ċ-ċertifikat fiżiku tagħhom, iżda qed jinħarġu wkoll Blockcert bl-użu tat-teknoloġija Blockchain. L-ITS kien l-ewwel Istitut fl-Ewropa li ħareġ dawn iċ-ċertifikati bl-użu ta’ din it-teknoloġija.
Min-naħa tiegħu, Carlo Micallef, Chairman tal-Bord tal-Gvernaturi tal-ITS, feraħ lill-istudenti għall-kisbiet tagħhom u żied li huwa s-sodisfazzjon kbir għalih li jara li l-ITS ikompli b’suċċess il-missjoni tiegħu bħala Istitut għat-tagħlim vokazzjonali ogħla.
Dawk l-istudenti li jibdew il-karriera tagħhom fis-settur tat-Turiżmu illum se jingħaqdu ma’ industrija b’saħħitha, waħda li qed tgawdi prestazzjonijiet rekord sena wara sena, bi prospetti pożittivi għas-snin li ġejjin.
