Barcelona fetħu vantaġġ ta’ tliet punti meta rebħu d-derby ta’ Katalunja kontra Espanyol 4-0. Free-kick preċiż ta’ Lionel Messi fis-17-il minuta poġġa lil Barcelona minn fuq, bil-Franċiż Ousmane Dembele jirdoppja fis-26 minuta b’xutt minn fuq in-naħa xellugija. Luis Suarez għalaq il-logħba qabel tmiem l-ewwel taqsima meta rċieva vertikalment u skorja minn angolu ristrett ħafna. Lionel Messi ssiġilla r-rebħa f’nofs it-tieni taqsima bi free-kick ieħor dirett.
Atletico Madrid laħqu lil Sevilla fit-tieni post b’rebħa importanti ta’ 3-0 f’darhom fuq Alaves. Nikola Kalinic fetaħ l-iskor fil-25 minuta meta daħal tajjeb għal kross mil-lemin biex skorja mill-qrib. Huma għalqu l-logħba fit-82 minuta b’kontrattakk veloċi li fih Antoine Griezmann avvanza u wara li l-ewwel xutt ħabat mal-wieqfa, skorja mir-rebound mill-viċin. Rodri skorja t-tielet gowl ħames minuti wara b’xutt mill-viċin minn rebound.
Riżultati u Logħob li jmiss: Il-Ġimgħa: Leganes v Getafe 1-1, Is-Sibt: A. Madrid v D. Alaves 3-0 , Valencia v Sevilla 1-1 , Villarreal v C. Vigo 2-3 , Espanyol v Barcelona 0-4, Il-Ħadd: Eibar v Levante 12.00pm , Huesca v R. Madrid 4.15pm , R. Sociedad v R. Valladolid 6.30pm , R. Betis v R. Vallecano 8.45pm: It-Tnejn: A. Bilbao v Girona 9.00pm
Klassifika: Barcelona 31 punt, Sevilla 28 punt, Atletico Madrid 28 punt, Deportivo Alaves 24 punt, Real Madrid 23 punt, Getafe 21 punt, Levante 21 punt, Girona 21 punt, Espanyol 21 punt, Celta Vigo 20 punt, Real Betis 19-il punt, Real Sociedad 19-il punt, Valencia 18-il punt, Eibar 18-il punt, Leganes 17-il punt, Real Valladolid 17-il punt, Villarreal 14-il punt, Athletic Bilbao 11-il punt, Rayo Vallecano 10 punti, Huesca 7 punti
