Tliet uffiċjali tal-pulizija allegatament ġew attakkati minn mara mill-Gambja waqt spezzjoni tal-immigranti t-Tlieta filgħodu.
F’messaġġ fuq il-midja soċjali, l-Ispettur Sandro Camilleri ddikjara li wieħed mill-uffiċjali kellu jittieħed lejn l-Isptar Mater Dei biex jiġi ttestjat għal mard bħall-HIV.
Il-Pulizija kkonfermat li fid-9:15 ta’ filgħodu, waqt il-kontroll tal-immigranti, tliet pulizija ġew attakkati. Dan l-inċident seħħ fi Triq il-Vitorja f’Ħal Qormi fejn intqal li waqt din l-ispezzjoni l-mara saret aggressiva, b’uffiċjal tal-pulizija jiġi midrub b’mod ħafif.
Il-kontrolli li kienu qed isiru mill-Pulizija huma parti minn sensiela li qed isiru fl-aħħar ġimgħat, intiżi b’mod speċjali biex ikun iċċekkjat jekk il-barranin f’pajjiżna humiex hawn b’mod regolari jew le.
Intant fl-istess post fuq Facebook Camilleri kompla billi qal li hemm bżonn ta’ aktar ħarsien lill-pulizija u kif ukoll esprima s-solidarjetà tiegħu mal-vittmi ta’ dan l-inċident.
