GŻIRA UNITED…………… 2 ST. ANDREWS…………… 1
Gżira: J. Haber, J. Corbalan, R. Soares, F. Barbosa, T. Veronese, Z. Scerri, E. Bilbao Zarate, N. Muscat, A. Cohen (L. Brincat 90’), H. Garba, J. Pereira da Silva (C. Gatt Baldacchino 78’)
St. Andrews: M. Calleja Cremona, J. Walker (A. Friggieri 84’), T. Blagrove, A. Borg, A. Satariano, N. McLaren (K. Magro 46’), M. Grima (J. Farrugia 66’), M. Woo Ling, M. Davis, K. Reid, K. Atkinson
Imwissija: R. Soares 5’, J. Corbalan 51’ (G), N. McLaren 18’, J. Walker 55’ (S)
Skorjaw: H. Garba 12’, A. Cohen 69’ (G), M. Woo Ling 74’ (S)
Referee: Malcolm Spiteri
Assistenti Referees: Duncan Sultana, Theodore Zammit
In-Nazzjon Plejer tal-logħba: Andrew Cohen (Gżira United)
Attendenza: 160
Gowl f’kull taqsima kien biżżejjed biex Gżira United itemmu l-ewwel rawnd bla telfa, b’rebħa missielta ta’ 2-1 fuq St. Andrews. Din ir-rebħa fissret li tal-anqas sa nhar it-Tnejn, Gżira se jkunu waħedhom fil-quċċata tal-klassifika, u b’hekk se jgawdu ż-żmien ta’ festi b’mod pożittiv bħala l-uniku tim mingħajr telfa u fl-ogħla postijiet.
Partita tajba għal Andrew Cohen li jibqa’ jkun determinanti logħba wara l-oħra bil-passaġġ intelliġenti, fejn saħansitra għadu jsib l-ispazji t-tajbin biex anki hu jkun perikoluż. Logħba tajba wkoll għaż-żagħżugħ Nikolai Muscat, li speċjalment fl-ewwel taqsima kien perikoluż fuq il-lemin b’diversi passaġġi li wasslu għal azzjonijiet perikolużi.
St. Andrews offrew sfida denja u fiż-żewġ okkażjonijiet li kienu gowl minn taħt, setgħu faċilment ġabu d-draw bil-veloċità tal-plejers tagħhom toħloq ftit periklu lil Gżira. Għalihom spikka fost l-oħrajn il-gowlkiper Matthew Calleja Cremona li kien providenzjali f’diversi okkażjonijiet ta’ Gżira.
Darren Abdilla kellu jgħaddi mingħajr is-sospiżi Roderick Briffa u Sacha Borg kif ukoll mingħajr l-imweġġa’ Amadou Samb. Johann Scicluna wkoll kellu l-plejers sospiżi u kellu jibdel nofs il-grawnd biex jimtela l-vojt ta’ Ricardo Martin u Kevyn McFarlane kif ukoll tad-difensur laterali Amoy Brown. F’nofs il-grawnd kellu logħba tajba l-awtur tal-gowl Matthew Woo Ling li sab diversi okkażjonijiet biex javvanza fl-attakk.
Andrew Cohen ħoloq l-ewwel periklu wara erba’ minuti b’xutt fil-baxx li kien imxellef u mdawwar f’korner minn Matthew Calleja Cremona. Gżira fetħu l-iskor fit-12-il minuta meta Nikolai Muscat seraq ballun mingħand Adrian Borg, avvanza u b’altruwiżmu għażel li jqassam lil HARUNA GARBA fuq ix-xellug, bl-attakkant jiskorja mill-viċin.
It-tim ta’ Darren Abdilla kompla jattakka u fit-28 minuta Cohen qassam tajjeb lejn Thomas Veronese, bit-Taljan isib il-ballun quddiemu u xxuttja b’saħħtu djagonalment iżda Calleja Cremona blokka tajjeb. Ħames u tletin minuta u kien Nikolai Muscat li din id-darba serva lil Corbalan b’mod intelliġenti, iżda Calleja Cremona reġa’ kien attent u salva.
St. Andrews marru qrib li jiskorjaw fil-41 minuta bi kross mil-lemin ta’ Matthew Woo Ling li ma laħqu ħadd iżda wara li ħabat fil-kaxxa spiċċa mal-wieqfa. Ftit sekondi wara, Gżira resqu viċin li jirdoppjaw b’kontrattakk li fih Zarate tefa’ ballun fit-tul preċiż lejn Garba li avvanza u impenja lil Calleja Cremona li min-naħa tiegħu dawwar f’korner bi bravura.
It-tim ta’ Johann Scicluna mar viċin il-gowl tad-draw fl-44 minuta. Kien passaġġ vertikali ta’ Nicholas McLaren lejn Kevaughn Atkinson li qabad id-difiża Gżirjana fuq sieq waħda. Atkinson avvanza iżda ħa l-ballun ftit twil u Justin Haber blokka fil-ħin.
Gżira ħarġu fuq l-offensiva jfittxu t-tieni taqsima u kellhom xutt ta’ Garba u free-kick ta’ Cohen li kienu salvati tajjeb minn Calleja Cremona. Ċans tajjeb għal St. Andrews fit-58 minuta b’Davis jiftaħ lejn Reid iżda minn qagħda ideali spara għoli.
Il-Maroons dehru li għalqu l-logħba fid-69 minuta meta rdoppjaw wara li ANDREW COHEN xeħet għal ġewwa mill-viċin wara li Calleja Cremona xellef kross fil-baxx ta’ Garba mil-lemin. Iżda St. Andrews daħlu fil-logħba fl-74 minuta b’azzjoni tajba ta’ Davis mil-lemin li kkrossja għan-nofs b’MATTHEW WOO LING jidħol tajjeb u għeleb lil Haber b’xutt mill-ewwel.
Okkażjoni għal Gżira li jagħmluhom 3-1, b’xutt djagonali fil-baxx ta’ Garba li spiċċa ftit barra. Fl-aħħar minuti, Gżira ddefendew u kkontrollaw l-isforzi tal-avversarji biex ħadu t-tliet punti importanti.
