MOSTA………………… 2 QORMI…………………. 0
Mosta: A. Vella, M. Sammartino, F. Mazzavillani, S. Bonnici, R. Morisco, R. Romào, K. Frendo (K. Zammit 89’), M. Gomez (T. Farrugia 88’), Y. Cisotti, Z. Brincat (J. Brincat 83’), D. Angan
Qormi: J. Azzopardi, D. Kabeya, I. Zammit (M. Micallef 58’), A. Abela, D. Mansi, Y. Yankam, M. Arrieta (A. Kabeya 65’), M. Borg, F. Gnindokponou, A. Rozzi (Aleksandro 44’), T. Gusman
Imwissija: Y. Yankam 16’, A. Abela 38’, M. Borg 73’ (Q), M. Sammartino 29’, Z. Brincat 36’, R. Romào 55’, S. Bonnici 83’, K. Frendo 86’ (M)
Skorjaw: Y. Cisotti 23’, D. Angan 60’ (M)
Referee: Trustin Farrugia Cann
Assistenti Referees: Thomas Debono, Ivan Galea
Il-Mument Plejer tal-logħba: Yuri Cisotti (Mosta)
Rapport: George Cassar
Mosta kabbru d-distakk minn ma’ Qormi b’seba’ punti meta rebħulhom il-konfront dirett b’gowl kull taqsima. Għall-Qriema din kienet l-għaxar telfa infila fil-kampjonat li kompliet tpoġġihom f’sitwazzjoni prekarja fejn huma u Senglea Athletic komplew jiżolaw ruħhom f’qiegħ il-klassifika.
Mosta komplew juru progress taħt it-tmexxija ta’ Mark Miller li s’issa tilef biss fid-debutt tiegħu kontra Birkirkara u dan l-aħħar jinħass entużjażmu ikbar fil-logħob tal-plejers Mostin.
Qormi ma kellhomx wisq ħajja fl-attakk u waħda mill-problemi tagħhom tibqa’ l-livell baxx tal-plejers mhux Maltin, xi ħaġa li fil-Premier hija ta’ żvantaġġ kbir. Qormi kellhom żewġ debuttanti oħra li iżda ma solvewlhomx din il-problema: Antonio Rozzi li iżda weġġa’ lejn l-aħħar tal-ewwel taqsima, filwaqt li fit-tieni taqsima daħal mingħajr wisq effett Amos Kabeya.
Mosta skorjaw l-ewwel gowl eżatt f’nofs l-ewwel taqsima. L-azzjoni bdiet minn kross mix-xellug ta’ Zachary Brincat li daħal għalih YURI CISOTTI li antiċipa lil Iven Zammit qabel tefa’ fix-xibka. Qormi rreaġixxew minuta wara li sofrew il-gowl meta x-xutt ta’ Tensior Gusman kien salvat minn Andreas Vella li ma ġiex imqarraq mill-ballun minkejja li kellu r-riħ kontrih.
Man-nofs siegħa logħob kien hemm intervent ieħor tajjeb din id-darba mill-gowlkiper tan-naħa l-oħra Jamie Azzopardi li salva ferm tajjeb mill-viċin ix-xutt bid-dawra ta’ Rafael Morisco wara korner ta’ Massimo Sammartino.
Qormi resqu l-iktar qrib għaxar minuti qabel ħin il-mistrieħ meta x-xutt ta’ Freud Gnindokponou twaqqaf mil-lasta b’Antonio Rozzi ma japprofittax mir-rebound. L-attakkant Taljan weġġa’ f’din l-azzjoni u ftit wara ġie mibdul ma’ Aleksandro.
Wara għaxar minuti mill-bidu tat-tieni taqsima l-gowlkiper Qormi Jamie Azzopardi għamel l-isbaħ save tal-logħba meta salva d-daqqa ta’ ras ta’ Davy Agnan wara freekick ta’ Massimo Sammartino.
Mosta rduppjaw il-vantaġġ mas-siegħa logħob meta Misael Miranda Gomez ta pass fit-tul lejn DAVY ANGAN li ssupera lid-difiża Qormija u skorja b’xutt fil-baxx biex b’hekk l-attakkant mill-Kosta tal-Avorju skorja l-ewwel gowl fil-Premier fit-tieni logħba tiegħu bil-flokk Mosti.
