PIETÁ H………………….. 0 SLIEMA W……………… 3
Pietá: N. Vella. T. Ose, T. Bartolo, C. Grech, Tony, I. Jalo (C. Degabriele 82’), D. Agius, J. Busuttil (N. Pisani 82’), N. Pace Cocks, G. Mensah, P. Chimezie (S. Nakamura 68’)
Sliema: J. Galea, J. Mintoff (M. Sansone 82’), N. Ashong, K. Shaw, S. Biancardi, M. Scerri (P. Xuereb 78’), M. Muchardi, K. Amehi, Y. Marzouk, F. Temile, Jefferson (S. Cassar 85’)
Imwissija: M. Scerri 6’ (S), D. Agius 56’ (P), N. Pace Cocks 61’ (P)
Skorjaw: Jefferson 58’, N. Ashong 64’, Y. Marzouk 75’ (S)
Referee: Mario Apap
Assistent Referees: Christopher Francalanza, Roberto Vella
Il-Mument Plejer tal-Logħba: Younes Marzouk (Sliema Wanderers)
Attendenza: 359
Rapport: George Cassar
Pietà Hotspurs ikkontrollaw lil Sliema Wanderers sal-ewwel taqsima iżda mbagħad ċedew fit-tieni waħda u kawża t’hekk sofrew tliet gowls fi kwarta.
Wara r-rebħa ta’ Mosta fil-partita ta’ qabel, din it-telfa swiet qares għal Pietà li issa nqabżu mill-Mostin u waqgħu fit-tnax-il post. Dan ir-riżultat reġa’ poġġa lis-Slimiżi fit-triq tar-rebħ wara ż-żelqa kontra Balzan ta’ ġimgħa ilu u bi tliet punti li kisbu telgħu temporanjament waħedhom fir-raba’ post.
Il-Franċiż Younes Marzouk kellu waħda mill-aħjar prestazzjonijiet tiegħu kemm ilu li ngħaqad ma’ Sliema u kien involut fi tnejn mill-gowls, filwaqt li ma jonqos qatt ix-xogħol kontinwu tan-nofsani ħabrieki Matias Muchardi.
L-ewwel taqsima kienet xotta mill-azzjonijiet biż-żewġ timijiet jinnewtralizzaw lil xulxin iżda ftit li xejn joħolqu okkażjonijiet ta’ skor. L-uniku komklużjonijiet waslu minn Matias Muchardi li l-ewwel kellu daqqa ta’ ras li tmur għoli u qabel intemmet l-ewwel taqsima ix-xutt mill-qrib tiegħu mar għoli wkoll.
Żewġ minuti qabel is-siegħa logħob Sliema fetħu l-iskor meta l-free-kick ta’ Younes Marzouk kien salvat minn Nicky Vella li iżda ma żammx jew tajjar f’korner u JEFFERSON DE ASSIS kien qrib u tefa’ fix-xibka.
Sitt minuti wara, it-tim immexxi minn John Buttigieg irdoppja l-vantaġġ meta minn kross mix-xellug ta’ Kylian Amehi, NII NORTEY ASHONG tefa’ fir-rokna leminija ta’ Nicky Vella b’first-timer sabiħ. Kwarta mit-tmiem Younes MARZOUK inkuruna l-wirja tajba tiegħu meta għamel kollox waħdu billi evita żewġ difensuri u għadda l-ballun minn taħt il-gowlkiper għat-tielet gowl Slimiż.
Ħames minuti mit-tmiem Matias Muchardi ġieh iċ-ċans li jiskorja huwa wkoll iżda x-xutt tiegħu ħabat mal-wieqfa u mar f’idejn il-gowlkiper Vella. L-uniku tentattiv serju tal-Hotspurs wasal żewġ minuti mit-tmiem minn xutt ta’ Gabriel Mensah li Jake Galea tajru f’korner f’dak li kien l-uniku intervent serju tal-partita għall-gowlkiper Slimiż.
