Ole Gunnar Solskjaer tħabbar uffiċjalment bħala l-manager temporanju ta’ Manchester United sa tmiem l-istaġun. Solskjaer li għandu 45 sena nħatar b’effett immedjat, anqas minn 24 siegħa wara li Josè Mourinho tneħħa mill-kariga.
Hu kien qed imexxi lit-tim Norveġiż Molde u għandu kuntratt mal-klabb sal-2021 iżda tħalla jieħu t-tmexxija temporanja sa Mejju tas-sena d-dieħla. Il-klabb Norveġiż qal li qabel li jislef lil Solskjaer għal dan il-perjodu.
“Manchester United qegħdin f’qalbi u hu brillanti li se nirritorna f’dan l-irwol. Ninsab ħerqan li naħdem mal-iskwadra ta’ talent li għandna, l-istaff u kulħadd fil-klabb,” qal Solskjaer li kien skorja l-gowl rebbieħ fil-finali taċ-Champions League fl-1999.
Solskjaer mistenni jkun preżenti f’Carrington għada biex imexxi l-ewwel sessjoni ta’ taħriġ. Mike Phelan li fil-passat kien assistent ta’ Sir Alex Ferguson se jingħaqad bħala kowċ flimkien ma’ Michael Carrick u Kieran McKenna.
In-Norveġiż se jieħu ħsieb l-ewwel tim filwaqt li l-klabb ikun għaddej bit-tfittxija biex jaħtar il-manager li jmiss fis-sajf li ġej. L-istaġun ta’ Molde diġà spiċċa u ma jerġax jibda qabel Marzu. Solskjaer irringrazzja lil Molde talli ħallewh jieħu dan il-pass mhux solitu.
“Fil-futbol qatt ma tkun taf x’jista’ jiġri. Din hi opportunità li kelli nieħu. Ninsab ħerqan li mmexxi lil Manchester United sas-sajf. Fl-istess ħin se nsegwi mill-viċin x’qed jiġri hawn,” kompla Solskjaer.
Sky Sports fl-Ingilterra qed jgħidu li Manchester United huma interessati li jaħtru Direttur Tekniku għall-ewwel darba fl-istorja, bil-persuna jkun responsabbli biex jinħatar is-suċċessuri permanenti ta’ Mourinho fis-sajf.
Il-ħatra ta’ Solskjaer kienet mistennija wara li l-klabb aċċidentalment ħareġ l-aħbar fuq is-sit uffiċjali, b’filmat bl-isem ta’ “L-Aktar Lejl Famuż fil-Karriera ta’ Ole.” Il-filmat kellu t-titlu sekondarju “Solskjaer inħatar manager temporanju 20 staġun wara li rebaħ it-tripletta b’DAK il-gowl fil-Camp Nou…”
Solskjaer skorja 126 gowl f’366 logħba għal Manchester United bejn l-1996 u l-2007 u wara li rtira kien ukoll kowċ fil-klabb. B’kollox hu għamel 14-il sena u nofs assoċjat mal-klabb u ż-żmien intemm meta ħa t-tmexxija ta’ Molde għall-ewwel darba fil-bidu tal-2011.
Fil-bidu tal-2014 inħatar manager ta’ Cardiff fil-Premier League iżda taħt it-tmexxija tiegħu t-tim kien relegat. Hu kien tneħħa mill-kariga f’Settembru tal-istess sena wara bidu ħażin fiċ-Championship. Hu reġa’ rritorna ma’ Molde fl-2015 u fl-aħħar sentejn spiċċaw darbtejn fit-tieni post.
