Spettaklu kulurit u ħaj ieħor kif taf toffri ta’ kull sena l-Kumpanija Teatru Rjal għal żmien il-Milied b’pantomima li din is-sena teħodna fil-ġungla ma’ Mowgli u l-annimali li rabbewh.
Junglebook hija l-pantomima bil-Malti li bdiet bl-ewwel tliet rappreżentazzjonijiet matul din it-tmiem il-ġimgħa u tkompli kuljum fl-Istitut Kattoliku bejn is-26 sat-30 ta’ Diċembru li ġej. Dan apparti rappreżentazzjoni oħra fil-5 ta’ Jannar tas-sena l-ġdida.
Żorna r-rappreżentazzjoni tal-Ħadd waranofsinhar fejn ltqajna mal-producer, Pawlu Testa, li tana aktar tagħrif dwar il-panto ta’ din is-sena:
“Din is-sena għażilna Junglebook, ambjenatata fil-ġungla. Hija storja mexxejja u m’hemmx kumplikazzjonijiet fiha. L-importanti għalina li twasslek biex toffri spettakli.”
Spettaklu bħal dan, li qed jittella’ fuq kitba ta’ DANUSAN u direzzjoni ta’ Ray Abdilla, jinvolvi ukoll akkumpanjament mużikali kontinwu fdat f’idejn Conrad Briffa u korjografija mill-Kinetic Dance Studio. Dan filwaqt li l-kostumista Marika Zarb kellha biċċa uġigħ ta’ ras biex setgħet tħejji il-kostumi għal din il-produzzjoni.
Staqsejna lil Testa ukoll dwar is-satira li l-udjenza mistennija tesperjenza fil-panto:
“Tagħżel storja però għandek il-liċenzja li tbiddel minnha, iżżomm il-linja tagħha u imbagħad tmur lil hinn mill-istorja. Però mhux satira biss toffri, toffri kollox, speċjalment battuti fejn tidħol il-politika. Turina kemm il-poplu huwa matur għaliex fiha din tgħaddi passata biż-żewġ partiti u n-nies aktar tidħaq.”
Id-dama ta’ din is-sena se jkun Rodney Gauci li se jinterpreta l-parti ta’ Baloola. Huwa se jingħaqad ma’ bosta kantanti u atturi fosthom Mario Cassar li se jinterpreta l-parti ta’ kaċċatur. Huwa tkellem dwar dan id-debut għalih fil-panto:
“L-ewwel pantomima tiegħi. Jien wieħed mill-bad guys, għalkemm intuh daqxejn laqta komika. L-iktar li nagħmel ngħajjat mal-oħrajn. Għandi miegħi lil Brian Farrugia, qed jagħmilha ta’ Redent u ngħajjat miegħu iġifieri: ‘Redent ijwa ejja għinni ħa naqbdu t-tigra!’.”
Wieħed jista’ jirriżerva post fit-teatru billi jidħol fuq is-sit ktrmalta.com jew iċempel fuq 99976468.
