Il-Qorti Kostituzzjonali, Preseduta mill-Imħallef Robert Mangion, irrifjutat l-aħħar attentat tal-Ministru Konrad Mizzi biex ikompli jtawwal kemm jiflaħ l-Inkjesta dwar Panama Papers.
Dan hekk kif il-Qorti ma laqgħetx talba ta’ Mizzi, li kien fetaħ kawża kostituzzjonali fejn iddikjara li nkisirlu d-dritt tiegħu għal smiegħ xieraq waqt li jiddikjara li l-protest ġudizzjarju kontrih għandu l-iskop li jħammeġ l-integrità tiegħu.
Il-każ fil-konfront ta’ Konrad Mizzi kien beda wara li Simon Busuttil, dak iż-żmien Kap tal-Oppożizjzoni, kien talab li tibda inkjesta wara li l-Panama Papers kixfu li Konrad Mizzi u Keith Schembri, iċ-Chief of Staff tal-Prim Ministru kellhom kumpaniji fil-Panama.
L-inkjesta għandha l-għan li jsir magħruf jekk inkisrux il-liġijiet kontra l-ħasil ta’ flus meta uffiċjali għolja fi ħdan il-Gvern Laburista fetħu kumpaniji offshore fl-Panama. L-inkjesta għandha tinvestiga mhux biss lill-Ministru Mizzi u lil Keith Schembri, imma wkoll lill-Prim Ministru Joseph Muscat kif ukoll lil Brian Tonna, Karl Cini, Malcolm Scerri kif ukoll Adrian Hillmann.
Iżda minkejja li l-inkjesta suppost ilha li bdiet żmien twil, il-Ministru Konrad Mizzi għamel mossa wara l-oħra biex iżomm milli din tavvanza … b’din il-kawża kostituzzjonali tkun l-iktar riċenti mit-tattiċi tiegħu biex isir dan.
Fl-applikazzjoni tiegħu, il-Ministru Mizzi ddikjara li hu m’għandux jieħu sehem attiv fil-proċeduri li għaddejjin, liema applikazzjoni ġiet rifjutata. Għall-kuntrarju tiegħu, Simon Busuttil bħal dejjem kien preżenti fil-Qorti meta kellu jkompli l-każ.
F’mossa ċara biex jaħrab milli jaffaċċja l-ġustizzja, fil-kawża kostituzzjonali tiegħu Konrad Mizzi kien qed jitlob lill-Qorti wkoll biex tiddikjara r-rikjesti ta’ Simon Busuttil, kif ukoll dawk ta’ David Casa, bħala nulli u ineffettivi.
