Birkirkara ħabbru uffiċjalment it-tieni akkwist tagħhom għas-suq tat-trasferimenti ta’ Jannar hekk kif kisbu l-firma tal-plejer tat-tim nazzjonali Malti Clayton Failla mingħand Floriana b’kuntratt ta’ sentejn u nofs. Wara l-akkwist ta’ Muamer Svraka ftit jiem ilu, il-plejer ta’ 32 sena se jagħti wkoll versatilità lill-kowċ ta’ Birkirkara Paul Zammit hekk kif Failla jista’ jilgħab bħala difensur laterali fuq ix-xellug, kif ukoll f’nofs il-grawnd.
Hu kien għamel id-debutt fil-Kampjonat Premier ma’ Żabbar St. Patrick fl-istaġun 2004/2005. Hu jibqa’ rinomat l-aktar għaż-żmien tiegħu li għamel ma’ Hibernians hekk kif ingħaqad fl-2005 u b’eċċezzjoni ta’ żewġ staġuni ma’ Sliema Wanderers, lagħab mal-Pawlisti sas-sajf li għadda.
Failla ngħaqad ma’ Floriana bi preparazzjoni għal dan l-istaġun, iżda minkejja li kien plejer regolari naqas li jħalli l-impatt mixtieq tant li spiċċa bidel il-klabb wara nofs staġun.
