Il-preparazzjonijiet ta’ Novak Djokovic għall-Open tal-Awstralja sofrew intopp mhux mistenni hekk kif kien megħlub minn Roberto Bautista Agut fis-semifinali tal-Open tal-Qatar. Is-sid numru wieħed tad-dinja sofra l-ewwel telfa fl-istaġun il-ġdid f’partita missielta li damet sagħtejn u nofs, b’Roberto Bautista Agut joħroġ rebbieħ 6-3, 6-7, 6-4.
L-Ispanjol li jinsab fl-24 post fir-rankings mondjali, tilef l-ewwel set tal-ġimgħa iżda rnexxielu jirkupra fit-tieni set biex ħoloq sorpriża. Bautista Agut kellu bżonn biss match point biex jassigura r-rebħa u fil-finali tal-lum se jilgħab kontra Tomas Berdych jew Marco Cecchinato.
“Se niftakar din il-logħba għal kumplament ta’ ħajti. Ma nistax inkun kuntent aktar milli ninsab bħalissa,” qal it-tennist ta’ 30 sena. Din hi t-tieni darba li Bautista Agut għeleb lil Djokovic fil-karrera, u ż-żewġ rebbieħ waslu f’semifinali. L-ewwel rebħa seħħet f’Ottubru tal-2016 fil-Masters ta’ Shanghai meta f’dak iż-żmien Djokovic kien ukoll is-sid numru wieħed tad-dinja.
