Kei Nishikori temm stennija ta’ tliet snin għal titlu ATP meta għeleb lil Daniil Medvedev fil-finali tal-Brisbane International. Il-plejer Ġappuniż li l-aħħar suċċess wasal fl-Open ta’ Memphis fl-2016, rebaħ 6-4, 3-6, 6-2 f’sagħtejn u erba’ minuti.
Dan kien it-12-il unur ATP fil-karriera għat-tennist ta’ 29 sena u temm sensiela ta’ disa’ telfiet konsekuttivi waqt finali. Is-sid numru disgħa tad-dinja rebaħ 70% tal-punt fuq is-service hekk kif patta għad-diżappunt meta tilef kontra Grigor Dimitrov fl-istess stadju tal-kompetizzjoni fl-2017.
Medvedev beda b’saħħtu u kiseb l-ewwel tliet logħbiet, iżda l-iżbalji tiegħu wasslu biex tilef sitt mis-seba’ logħbiet ta’ wara u spiċċa tilef l-ewwel set. Iż-żagħżugħ ta’ 22 sena ssielet biex daħal fil-logħba u kiseb break importanti fit-tmien logħba tat-tieni set biex sforza t-tielet set.
Iżda s-sid numru 16 fid-dinja ma wettaqx ir-rimonta sħiħa hekk kif tilef it-tliet logħbiet li kellu bis-service biex ma kienx kapaċi jirbaħ ir-raba’ titlu ATP f’sena.
