GŻIRA U…………….. 1 TARXIEN R………… 1
Gżira: J. Haber, J. Corbalan, R. Soares, F. Barbosa, S. Borg, R. Briffa, N. Muscat (S. Domoraud 64’), E. Bilbao Zarate (Z. Scerri 64’), A. Cohen, J. Mengolo (C. Gatt Baldacchino 87’), H. Garba
Tarxien: A. Cassar, M. Spiteri, M. Botta, D. Zerafa, S. Radovanovic (D. Vassallo 90’), A. de Barros, G. Aquilina, J. da Paixao (A. Nilsson 79’), D. Falzon, R. Faria, M. Paolucci (L. Grech 93’)
Imwissija: M. Paolucci 19’, A. de Barros 75’, D. Falzon 76’, D. Zerafa 88’ (T), J. Mengolo 41’, E. Bilbao Zarate 50’, S. Borg 88’, J. Corbalan 89’ (G)
Skorjaw: A. Cohen 80’ (G), D. Falzon 91’ (T)
Referee: Etienne Mangion
Assistenti Referees: Alan Camilleri, Duncan Sultana
Il-Mument Plejer tal-logħba: Andrea Cassar (Tarxien Rainbows)
Attendenza: 496
Gowl ftit sekondi mit-tmiem ċaħħad lil Gżira United milli jwieġbu għar-rebħa ta’ Hibernians biex minkejja li għadhom bla telfa, issa jinsabu żewġ punti taħt il-Pawlisti. Gżira żgur iħossu li nsterqulhom żewġ punti minħabba li kellhom ħafna mil-logħba, bil-gowlkiper ta’ Tarxien Andrea Cassar ikun strumentali f’diversi okkażjonijiet biex ħalla lit-tim fil-logħba.
Fl-ewwel taqsima, Gżira kienu aħjar minn Tarxien iżda minkejja li kellhom diversi okkażjonijiet, naqsu li jsibu x-xibka. Nikolai Muscat prova bl-ewwel tentattiv wara sitt minuti li spiċċa barra, b’Tarxien joħolqu l-unika periklu tagħhom fit-taqsima bi kross ta’ Stefan Radovanovic li qabeż lil Haber u ħabat mal-wieqfa.
Gżira kienu perikolużi wkoll fl-14-il minuta b’Justin Mengolo jgħaddi lejn Juan Corbalan iżda x-xutt tiegħu stampa mal-mimduda. Andrea Cassar salva tajjeb xutt fuq il-ġirja ta’ Haruna Garba fit-28 minuta, biex erba’ minuti wara, biegħed parzjalment kross ta’ Sacha Borg, bil-ballun jispiċċa għand Juan Corbalan li iżda minn qagħda ideali xxuttja għoli.
Fit-tieni taqsima, Gżira żiedu l-isforzi tagħhom u kellhom serje ta’ azzjonijiet mill-plejers offensivi tagħhom iżda l-gowlkiper Andrea Cassar dejjem kien attent biex isalva li ġie għal idejh. Fil-65 minuta Cassar dawwar f’korner xutt fuq il-ġirja tas-sostitut Sofian Domoraud li b’azzjoni personali daħal fil-kaxxa djagonalment. Mill-istess korner, id-daqqa ta’ ras ta’ Mengolo ħabtet mal-mimduda.
Aktar ma beda jgħaddi l-ħin, Gżira dehru naqqsu mill-attakki kontinwi tagħhom b’Tarxien imewtu l-logħba kemm jistgħu. Kien fit-80 minuta li Gżira dehru li skorjaw il-gowl tar-rebħa. Kien kross mil-lemin ta’ Juan Corbalan, bil-veteran ANDREW COHEN jidħol tajjeb biex b’daqqa ta’ ras għeleb lil Andrea Cassar.
Fl-aħħar minuti, Tarxien kellhom ftit mumenti fl-attakk u rnexxielhom iġibu d-draw fil-91 minuta. Kien korner mix-xellug u Domoraud laqat il-ballun ħażin u spiċċa għand DAREN FALZON li minn metru bogħod skorja l-gowl tad-draw.
