It-tennista Nru 1 tad-dinja, Novak Djokovic u r-raba’ seed, Alexander Zverev, avvanzaw għat-tielet rawnd tal-Open tal-Awstralja li qed jintlagħab f’Melbourne. Dan waqt li Simona Halep, in-Nru 1 fil-kategorija tan-nisa u l-veterana, Serena Williams ukoll għelbu l-isfidi rispettivi – iżda mhux mingħajr ftit tad-diffikultà.
Djokovic – li rebaħ din il-kompetizzjoni sitt darbiet — qed iħares ‘il quddiem wara rebħa, fi straight sets, fuq il-Franċiż Jo-Wilfried Tsonga, 6-3, 7-5 u 6-4. Il-konfront ma’ Tsonga kien ripetizzjoni tal-finali tal-2008 f’Melbourne meta s-Serb kien rebaħ wara erba’ sets biex jaċċerta mill-ewwel titlu Grand Slam. Fir-rawnd li jmiss Djokovic se jiffaċċja lill-Kanadiż, Denis Shapovalov, li hu s-seed Nru. 25 .
Intant, Alexander Zverev tal-Ġermanja tilef diversi opportunitajiet biex jagħlaq il-konfront mal-Franċiż, Jeremy Chardy, iżda fl-aħħarnett irnexxielu jibbukkja post fit-tielet rawnd tal-kompetizzjoni b’rebħa 7-6, 6-4, 5-7, 6-7 u 6-1.
Zverev, ir-raba’ fir-rankings dinjija, hu meqjus bħala protagonista fost il-ġenerazzjoni ġdida ta’ tennisti. Intant, il-Ġermaniż għad irid jisfida bis-serjetà għal titlu Grand Slam u jeħtieġ juri konsistenza akbar jekk irid ikompli javvanza f’dan it-tournament.
Simona Halep, tar-Rumanija, kienet kważi maħsuda mill-Amerikana, Sofia Kenin, iżda żammet il-kalma biex tissupera lill-avversarja fis-sett finali. Halep irnexxielha tikseb vantaġġ tajjeb bir-rebħ tal-ewwel set u break iżda ma kellhiex tweġiba għar-rimonta ta’ Kenin, b’kollox ikun deċiż fit-tielet u l-aħħar sett, fejn ir-Rumena, sa fl-aħħar, uriet il-kwalità tagħha għal rebħa 6-3, 6-7 u 6-4. Halep issa tilgħab kontra Venus Williams tal-Istati Uniti fir-rawnd li jmiss.
Sadanittant, Serena Williams – oħt Venus – eliminat lill-Kanadiża Eugenie Bouchard fi straight sets biex għada tittama fir-rebħ ta’ 24 titlu Grand Slam li bih tkun laħqet ir-rekord ta’ kull żmien.
Williams, is-seed numru 16, ma ħarsitx lura wara li rebħet l-ewwel set kontra l-avversarju li kienet waslet sal-finali ta’ Wimbledon, fl-2014. U għalkemm Bouchard kellha l-mumenti tagħha, Williams uriet li qed tirritorna għall-aħjar forma, meta hi kunsidrata favorita li tirbaħ it-tournament f’Melbourne. Serena Williams, issa, tikkonfronta lil Dayana Yastremska ( is-57 seed) fit-tielet rawnd tal-kompetizzjoni.
Fil-Men’s Doubles, Jamie Murray u Bruno Soares (rebbieħa tal-Open tal-Awstralja fl-2016) għaddew għat-tieni rawnd, f’Melbourne, b’rebħa fuq Roman Jebavy (Repubblika Ċeka) u Andres Molteni (Arġentina), 6-4, 7-6 biex issa jiltaqgħu mal-koppja Britannika Luke Bambridge u Jonny O’Mara.
