Napoli tilfu żewġ punti importanti fiċ-ċans żgħir li jisfidaw għar-rebħ tal-kampjonat meta sfaw miżmuma fi draw ta’ mingħajr gowls kontra Milan f’San Siro. Dan iwassal biex jekk jirbħu llum, Juventus jiftħu vantaġġ ta’ 11-il punt fil-quċċata.
Din il-logħba fissret l-ewwel logħba f’San Siro bħala avversarju għal kowċ ta’ Napoli Carlo Ancelotti minn meta ħalla lil Milan fl-2009. Għal Milan għamel id-debutt fl-aħħar 20 minuta l-akkwist il-ġdid Krzysztof Piatek. Iż-żewġ timijiet kellhom l-okkażjonijiet tagħhom f’logħba pjuttost bilanċjata, għalkemm fl-aħħar kwart tal-logħba, kienu Napoli li fittxew aktar il-gowl tar-rebħa, b’Piotr Zielinski jmur darbtejn qrib il-gowl.
Mateo Musacchio seta’ skorja l-gowl tar-rebħa għal Milan fit-78 minuta b’ġest akrobatiku mill-isbaħ, iżda David Ospina kien attent biżżejjed u salva fuq il-linja. Lejn it-tmiem Fabian Ruiz intwera t-tieni karta safra filwaqt li tkeċċa Ancelotti minħabba protesti.
Fabio Quagliarella kompla l-kampjonat pożittiv tiegħu u għen lil Sampdoria jġibu fix-xejn lil Udinese b’rebħa ta’ 4-0 fi Stadio Marassi. Bid-doppjetta li skorja, Quagliarella laħaq ir-rekord ta’ Gabriel Batistuta hekk kif skorja fi 11-il logħba konsekuttiva.
Sampdoria fetħu l-iskor fit-33 minuta meta r-referee Davide Massa ordna penalty meta ġġudika li Valon Behrami waqqa’ lil Gregoire Defrel. Mill-11-il metru FABIO QUAGLIARELLA ma żbaljax. Huma rduppjaw fis-56 minuta meta ngħataw it-tieni penalty, din id-darba meta x-xutt ta’ Nicola Murru ħabat ma’ id Nicholas Opoku. FABIO QUAGLIARELLA reġa’ nkariga ruħu u għeleb lil Juan Musso b’xutt b’saħħtu.
It-tim ta’ Marco Giampaolo għalaq il-logħba fit-68 minuta f’azzjoni maħduma tajba li fiha KAROL LINETTY skorja minn qagħda ideali. Il-festa Doriana kompliet b’MANOLO GABBIADINI jiskorja r-raba’ gowl u l-ewwel wieħed fir-ritorn ma’ Sampdoria meta kompla għal ġewwa kross mix-xellug.
Sassuolo għelbu lil Cagliari 3-0. Huma marru fil-vantaġġ wara disa’ minuti meta Alessio Cragno salva parzjalment ix-xutt fil-baxx ta’ Domenico Berardi, b’MANUEL LOCATELLI jkun pront biex skorja mir-rebound mill-viċin.
Huma rduppjaw qabel tmiem l-ewwel taqsima meta ngħataw penalty għal fawl ta’ Darijo Srna fuq Filip Djuricic. Ir-referee Massimiliano Irrati ordna l-penalty wara l-konsultazzjoni mal-VAR. Mill-11-il metru KHOUMA BABACAR ħalla lil Cragno jħares. ALESSANDRO MATRI ssiġilla r-rebħa fis-87 minuta hekk kif skorja mill-qrib wara kross mil-lemin.
