BALZAN……………………. 1 SENGLEA A………………. 2
Balzan: S. Sultana, J. Grioli (A. Effiong 65’), S. Bezzina, A. Kosoric, E. Serrano, P. Fenech, M. Lepovic, U. Ljubomirac, R. Correa, Kadù, A. Majdevac
Senglea: M. Farrugia, C. Sammut (M. Bartolo 88’), Z. Cassar, A. Mrsulja, G. Leyton, D. Venancio, B. Volpini (C. Cutajar 59’), L. Grech, T. Marukawa, A. Caseres (G. Camilleri 81’), Romulo
Imwissija: P. Fenech 36’, R. Correa 77’, E. Serrano 92’ (B), L. Grech 39’ (S)
Skorjaw: U. Ljubomirac 1’ (B), A. Mrsulja 62’, A. Caseres 67’ (S)
Referee: Etienne Mangion
Assistenti Referees: Alan Camilleri, Thomas Debono
In-Nazzjon Plejer tal-logħba: Taisei Marukawa (Senglea Athletic)
Attendenza: 189
Rapport: George Cassar
Senglea Athletic dawru telfa f’rebħa u b’hekk komplew iżommu r-rekord perfett għas-sena 2019 li fiha s’issa kisbu tliet rebħiet minn daqstant partiti u b’hekk komplew bir-rinaxximent tagħhom f’dan it-tieni rawnd.
Balzan skorjaw gowl kmieni ħafna iżda mbagħad tilfu l-vantaġġ f’temp ta’ ħames minuti wara s-siegħa logħob u minn hemmhekk ma rnexxielhomx imqar isalvaw punt biex b’hekk fallew milli jitilgħu għall-inqas temporanjament waħedhom fir-raba’ post.
L-iskwadra ta’ Senglea kompliet tinbidel f’dan it-tieni rawnd hekk kif ilbieraħ kien hemm tliet debuttanti oħra fil-formazzjoni inizjali li tnejn minnhom kellhom sehem dirett fiż-żewġ gowls Sengleani.
Fil-lemin tad-difiża beda ż-żagħżugħ misluf mingħand Gżira United Christian Sammut. Fiċ-ċentru tad-difiża lagħab għall-ewwel darba u skorja l-Kroat Arian Mrsulja li beda dan l-istaġun ma’ Birkirkara. Madankollu ħafna mid-differenza għamilha d-debuttant l-ieħor Taisei Marukawa li dejjem kien perikoluż kull meta kellu l-ballun f’saqajh fuq iż-żewġ naħat tal-attakk Senglean.
Balzan marru fil-vantaġġ wara biss 28 sekonda. Wara l-kick-off, il-ballun wasal għand Andrija Majdevac li x-xutt tiegħu kien imblukkat mill-gowlkiper Matthew Farrugia, iżda UROS LJUBOMIRAC ħa r-rebound u tefa’ fir-rokna tax-xibka, Dan kien it-tieni l-iktar gowl kmien ta’ dan l-istaġun wara dak li kien skorja Jurgen Degabriele ta’ Hibernians kontra Ħamrun Spartans f’Ottubru li għadda.
Senglea ħarġu għat-tieni taqsima fuq l-offensiva. Wara ħames minuti Augusto Caseres rċieva kross mil-lemin iżda Steve Sultana laħaq qabel u żamm il-ballun qabel il-linja tal-gowl.
It-tim mill-Kottonera skorja l-gowl tad-draw ftit wara s-siegħa l-logħob. Minn free-kick ta’ Diego Venancio, Steve Sultana blokka l-ballun fid-difensur Steve Bezzina u ADRIAN MRSULJA ħa l-ballun mitluf u skorja.
Senglea rnexxielhom anki jmorru minn fuq fi-67 minuta. L-azzjoni bdiet b’ġirja mix-xellug ta’ Taisei Marukawa, li kompla lejn AUGUSTO CASERES li baqa’ jsegwi l-azzjoni u skorja mill-qrib.
Balzan heddew biss il-gowl tal-parità b’xutt ta’ Andrija Majdevac li mar għoli biex b’hekk sofrew l-ewwel telfa fi tliet xhur. B’din ir-rebħa Senglea ħarġu miż-żona tar-relegazzjoni għall-ewwel darba dan l-istaġun u telgħu fil-ħdax-il post.
