SIRENS …………… 3 LIJA A. …….……… 1
Sirens: M. Montfort, K. Farrugia, R. Mandic, D. Sant, R. Grech, L. Mijic (M.A. Bustos 74’), M. Del Negro (R. Fenech 57’), A. Morgon Filho, C. Gauci, A. Ige Adeshina, G. Gesualdi (R. Previ 81’).
Lija: L. Bonnici, J. Cassar, L. Muscat (P. Dandolo 58’), E. Beu, A. Azzopardi (D. Mintoff 78’), A. Borg, A. Bello-Osagie, M. Clinch, A. Galea (R. Sammut 86’), C. Gauci, K. Kuroki.
Referee: Philip Farrugia
Sirens għamlu pass ieħor lejn il-promozzjoni għall-Kampjonat Premier meta dawru l-iskor bi tliet gowls fit-tieni taqsima biex kisbu t-tmien rebħa konsekuttiva. Bla dubju li l-mixja ta’ Sirens hi waħda impressjonanti, anki jekk ilbieraħ kellhom jitħabtu tassew biex kisbu t-tliet punti. Fil-fatt Lija taw battikata ġmiela lil-leaders u saħansitra daħlu jistrieħu gowl minn fuq iżda kellhom iċedu għal żewġ xuttijiet mill-isbaħ mid-distanza li dawru l-andament tal-logħba.
L-ewwel periklu veru kien minn naħa ta’ Sirens b’azzjoni ta’ Adeshina u pass lejn Clive Gauci li x-xutt tiegħu mar ftit barra. Fit-22 minuta risposta ta’ Lija, minn azzjoni ta’ korner Leon Muscat għola tajjeb iżda d-daqqa ta’ ras tiegħu kienet fjakka u ċentrali. Fl-24 minuta azzjoni ta’ Morgon Filho lejn Gauci li ma laqatx minn qagħda tajba u f’risposta immedjata, Erjon Beu spara ftit għoli wara li kien żmarkat minn Kuroki.
Fit-33 minuta Lija fetħu l-iskor meta minn azzjoni ta’ korner, Leon Muscat niżżel bir-ras lejn CLIFFORD GAUCI li mill-viċin mattar siequ u xeħet fix-xibka. Fid-39 minuta azzjoni ta’ Morgon Filho li minn qagħda angolata mpenja lil Bonnici.
Fit-tieni taqsima Sirens ħarġu jattakkaw iżda kienu Lija li resqu qrib b’daqqa ta’ ras ta’ Kuroki li kienet salvat minn Montfort. Fil-61 minuta Sirens kisbu l-gowl tad-draw b’azzjoni personali ta’ MORGON FILHO u xutt sabiħ bid-dawra li spiċċa fir-rokna tax-xibka.
Wara dan il-gowl Sirens komplew jippressaw bit-tim ta’ Lija b’diffikultà fid-difiża. Lija waqqfu xi ftit il-pressjoni bi free-kick ta’ Beu li kien imblukkat minn Montfort. Fis-77 minuta Sirens marru fil-vantaġġ meta GAETANO GESUALDI skorja b’xutt sabiħ mid-distanza, xutt li ħasad għal kollox lil Bonnici.
Fit-93 minuta Sirens għalqu l-logħba meta bit-tim ta’ Lija żbilanċjat reġa’ kien MORGON FILHO li spara fix-xibka mill-viċin wara azzjoni ta’ kontrattakk.
Rebħa fl-aħħar sekondi għal Gudja
ŻEBBUĠ R. …………….. 1 GUDJA U. ……………….. 2
Żebbuġ: J. Borg, D. Fava, S. Schembri, R. Vella, H. Vella, S. Buhagiar, B. Muscat, T. Rodrigo dos Santos, J. Caetano da Silva, J. Farrugia, B. Gregori de Sousa.
Gudja: J. Debono, L. Martinelli, J. Bondin, A. Mizzi, F. Aboulezz, S. Diacono, L.J. Schembri, J. Farrugia, L. Cremona, A. Marshall Nagbe, R. Kooh Sohna.
Referee: Alan Mario Sant
Gudja żammew it-tielet post fil-klassifika grazzi għal rebħa drammatika kontra Żebbuġ, bil-gowl rebbieħ jasal proprju fl-aħħar sekondi tal-logħba. Żebbuġ ħolqu l-ewwel azzjoni denja wara ħames minuti meta xutt minn barra l-kaxxa ta’ Brandon Muscat ġie mdawwar f’korner minn Jonathan Debono u mill-istess korner, il-ballun ġie mxellef u finalment HUBERT VELLA spara fix-xibka.
Wara l-mistrieħ, Gudja ħarġu xi ftit aktar aggressivi u fis-57 minuta xutt minn qagħda tajba ta’ Luca Martinelli għadda għoli. L-isforzi ta’ Gudja taw il-frott fis-66 minuta meta f’azzjoni veloċi Firas Aboulezz zmarka lil RAPHAEL KOOH SOHNA, dan avvanza, l-ewwel tentattiv tiegħu kien salvat minn Jurgen Borg, il-ballun reġa’ spiċċa f’saqajn l-istess player mill-Kamerun li din id-darba tefa’ fix-xibka.
Gudja komplew juru l-aħjar ideat u fil-75 minuta free-kick minn pożizzjoni ċentrali minn ftit barra l-kaxxa mogħti minn Firas Aboulezz għadda ftit għoli.
Issa Gudja ħadu l-kontroll assolut tal-logħba u fl-aħħar azzjoni tal-logħba Gudja skorjaw il-gowl tar-rebħa wara xutt fil-baxx ta’ RAPHAEL KOOH SOHNA li ħabat ma’ plejer avversarju u l-ballun spiċċa fix-xibka.
