Taħt il-Gvern Laburista, l-familji qed jinsterqu b’kontijiet tad-dawl u l-ilma għoljin u aktar spissi u issa dan ġie kkonfermat ukoll fil-Qorti, li ma laqgħetx l-argumenti preliminari li ppreżentaw l-avukati tal-ARMS dwar il-mod kif qed jinħadmu l-kontijiet tad-dawl u l-ilma.
L-ARMS stess ammettiet li fl-aħħar ġimgħat ippruvat tirranġa s-sitwazzjoni wara li waslulha għadd kbir ta’ lmenti mingħand il-konsumaturi.
Mill-mijiet ta’ kontijiet tad-dawl u l-ilma li l-familji ġabu għandu l-Partit Nazzjonalista, jirriżulta li mat-80% kienu qed iħallsu ferm aktar għad-dawl u l-ilma li jikkunsmaw u kienu qed jinsterqu bil-mod kif l-ARMS qed joħorġu l-kontijiet. Għalhekk il-Partit Nazzjonalista jilqa’ d-deċiżjoni tal-Qorti u dan huwa pass ‘il quddiem biex issir ġustizzja mal-ħafna konsumaturi.
Il-Partit Nazzjonalista fi stqarrija qal illi jinsab imħasseb ukoll bil-mod kif il-Maltin qed iħallsu kontijiet għoljin ħafna meta wieħed iqis il-prezz li bih il-Gvern qed jixtri l-gass minn barra. Fir-rapport tal-Awditur Ġenerali, jirriżulta li l-Enemalta xtrat l-inqas mill-interconnector meta l-prezz kien l-orħos u xtrat l-iżjed meta l-prezz kien l-ogħla. Jirriżulta wkoll li kieku fl-istess perjodu, l-Enemalta xtrat aktar bil-għaqal mill-interconnector kienet tiffranka eluf kbar ta’ ewro, filwaqt li kieku għażlet l-interconnector minflok l-power station ta’ Konrad Mizzi, l-famiji kienu jiffrankaw miljuni kbar ta’ ewro.
Fid-dawl tad-deċiżjoni tal-Qorti, il-Partit Nazzjonalista se jibqa’ jinsisti biex dan is-serq fil-kontijiet jispiċċa u jfakkar fil-wegħda ewlenija tal-Kap tal-Partit Nazzjonalista Adrian Delia li, tkun xi tkun id-deċiżjoni tal-Qorti fiż-żmien li ġej, Gvern Nazzjonalista ġdid se jrodd lura lill-familji l-flus kollha li nsterqu mill-kontijiet tad-dawl u l-ilma.
