MOSTA………………. 0 BALZAN…………….. 0
Mosta: A. Vella, D. Xuereb, M. Sammartino, T. Farrugia, R. Morisco, K. Frendo (J. Brincat 61’), G. Cuomo, F. Franchini (Z. Brincat 88’), Y. Cisotti, A. Roach, A. Darlington (D. Bonnici 84’)
Balzan: S. Mintoff, I. Bozovic (J. Grioli 76’), S. Bezzina, N. Sljivic, A. Kosoric, S. Pisani, M. Lepovic, U. Ljubomirac, A. Effiong (L. Micallef 67’), Kadù, A. Majdevac
Imwissija: I. Bozovic 7’, A. Kosoric 48’ (B), A. Roach 67’ (M)
Referee: Darryl Agius
Assistenti Referees: Duncan Sultana, Duncan Spencer
Il-Mument Plejer tal-logħba: Kadù (Balzan)
Rapport: George Cassar
Balzan reġgħu waqqgħu l-punti kontra tim ieħor min-naħa t’isfel fil-klassifika fl-ewwel logħba tal-kowċ Jacques Scerri. Wara t-telfa diżappuntanti fl-aħħar logħba kontra Senglea Athletic li instigat ir-riżenja minn kowċ ta’ Marko Micovic, Balzan waqqgħu żewġ punti oħra biex issa t-tama għal kwalifikazzjoni għall-Europa League qed tibda tonqos ukoll.
Dan il-punt jiswa ħafna lil Mosta fit-taqtigħa tagħhom kontra r-relegazzjoni għalkemm issa ntlaħqu wkoll minn Senglea Athletic li rebħu l-konfront tagħhom.
Balzan ħolqu logħob tajjeb għal ħafna mil-ħin iżda bdew ifallu fl-aħħar pass fejn qed ikompli jinħass sew in-nuqqas ta’ attakkant li kapaċi jikkonkludi fix-xibka. Il-kowċ Scerri ma setax jutilizza lil Paul Fenech f’nofs il-grawnd minħabba li dan kien sospiż iżda kien hemm ir-ritorn tal-akkwist l-ieħor ta’ Jannar Steve Pisani li kien ħabrieki. Bejn il-lasti ġie ppreferut Sean Mintoff minflok il-gowlkiper regolari Steve Sultana.
Mosta kellhom zewġ debuttanti hekk kif l-attakkant prinċipali tagħhom kien il-plejer minn Wales Alexander Darlington filwaqt li f’nofs il-grawnd lagħab għall-ewwel darba l-eks plejer ta’ Carpi Federico Franchini li deher li integra mill-ewwel u kien ferm attiv.
Balzan ħarġu kkargati għall-gowl u kienu qrib darbtejn fl-ewwel ħames minuti minn żewġ azzjonijiet ta’ Andrija Majdevac li iżda dam biex ikkonkluda. Matul il-ħin Mosta bdew jintegraw u bdew jilqgħu tajjeb lill-avversarji. Qabel għalqet l-ewwel taqsima, Alfred Effiong, bi kross mix-xellug, ġab waħdu lil Uros Ljubomirac iżda dan, bil-gowlkiper biss quddiemu, għolla wisq il-ballun u ċ-ċans inħela.
It-tieni taqsima kienet iddominata għal ħafna ħin minn Balzan li wara biss seba’ minuti resqu ferm qrib meta minn kross mix-xellug ta’ Kadù, id-daqqa ta’ ras mill-viċin ta’ Andrija Majdevac laqtet il-mimduda u niżlet qrib il-linja tal-gowl.
L-aħjar ċans ta’ Balzan wasal kwarta mit-tmien meta Andrija Majdevac ġab kompletament waħdu lis-sostitut Lydon Micallef li iżda xxuttja dirett ġol-gowlkiper Andreas Vella li baqa’ wieqaf u mblokka x-xutt. Il-partita baqgħet mingħajr gowls sal-aħħar u mas-suffara finali deher evidenti d-diżappunt tal-Balzanin filwaqt li l-Mostin dehru sodisfatti bil-punt miksub kontra tim li jinsab ħafna iktar ’il fuq minnhom.
