Ir-raba’ post li jfisser post fl-edizzjoni li jmiss taċ-Champions League qed ikompli jkun missielet aktar ma jgħaddu l-ġimgħat. Bħalissa Milan jinsabu fir-raba’ post b’39 punt, wieħed aktar minn Atalanta, Roma u Lazio. Fi tmiem il-ġimgħa tnejn minn dawn it-timijiet, jiġifieri Atalanta u Milan se jiltaqgħu kontra xulxin f’konfront importantissimu.
Atalanta jista’ jkun li bħalissa huma l-aktar tim fil-forma fil-kampjonat hekk kif rebħu ħamsa mill-aħħar sitt logħbiet fil-kompetizzjonijiet kollha mill-waqfa tax-xitwa, b’16-il gowl skorjat. Milan ukoll għaddejjin minn perjodu tajjeb hekk kif għadhom ma tilfux fil-kampjonat fl-2019 bi tliet rebħiet u żewġ draws filwaqt li bħal Atalanta għaddew għas-semifinali tal-Coppa Italia.
Dwell partikolari se jkun bejn l-attakkanti Duvan Zapata u Krzysztof Piatek. Zapata skorja 16-il gowl fis-Serie A, 15-il gowl minnhom fl-aħħar 10 logħbiet tal-kampjonat, filwaqt li Piatek skorja 15-il gowl u kellu bidu feliċi kemm ilu li ngħaqad ma’ Milan mingħand Genoa. Milan għandhom difiża aħjar minn ta’ Atalanta, iżda l-Bergamasci għandhom l-aħjar attakk tal-kampjonat b’50 gowl u l-fatt li se jilagħbu f’darhom ikompli jagħmel il-logħba għal Milan aktar diffiċli.
Jekk it-taqtigħa għar-raba’ post hi missielta, Inter iridu jagħmlu ċert li ma jagħmlux it-tielet post missielet ukoll. Huma bħalissa jinsabu erba’ punti fuq Milan u mhux għaddejjin mill-aqwa forma.
Wara li fl-2019 ma kinux rebħu fil-kampjonat u kienu eliminati mill-Coppa Italia, Inter irritornaw għar-rebħ kontra Parma b’gowl ta’ Lautaro Martinez. L-istess plejer skorja l-gowl tar-rebħa fl-ewwel leg tal-aħħar 32 tal-Europa League kontra Rapid Vienna.
Il-kwistjoni dwar it-tneħħija minn captain ta’ Mauro Icardi ħalliet xi ftit effett fuq l-ambjent ta’ Inter u għadu mhux magħruf jekk l-attakkant hux se jkun inkluż għal kontra Sampdoria.
Il-Blucerchiati qed jittamaw għal post fl-Europa League u kapaċi jieħdu vantaġġ jekk Inter jagħmlu ċertu żbalji. Inter iridu joqogħdu attenti għal Fabio Quagliarella li qed ikollu staġun mill-aqwa, iżda jekk jirbħu dan il-konfront ikunu dawru ftit ir-rotta u jsaħħu t-tielet post.
Serie A
Ilbieraħ: Juventus v Frosinone 3-0, Illum: Cagliari v Parma 6.00pm , Atalanta v Milan 8.30pm , Għada: Spal v Fiorentina 12.30pm , Empoli v Sassuolo 3.00pm , Genoa v Lazio 3.00pm , Udinese v Chievo 3.00pm , Inter v Sampdoria 6.00pm , Napoli v Torino 8.30pm , It-Tnejn: Roma v Bologna 8.30pm
Klassifika: Juventus 66 punt, Napoli 52 punt, Inter 43 punt, Milan 39 punt, Atalanta 38 punt, Roma 38 punt, Lazio 38 punt, Torino 34 punt, Sampdoria 33 punt, Fiorentina 32 punt, Sassuolo 30 punt, Parma 29 punt, Genoa 25 punt, Spal 22 punt, Cagliari 21 punt, Udinese 19-il punt, Empoli 18-il punt, Bologna 18-il punt, Frosinone 16-il punt, Chievo 9 punti
