ST. ANDREWS……… 1 HIBERNIANS………….2
St. Andrews: M. Calleja Cremona, A. Satariano, R. Martin, T. Blagrove, D. Reid (D. Debono 81’), J. Farrugia, A. Borg, J. Walker (L. Sciberras 79’), M. Davis, D. Jackson, M. Woo Ling (A. Friggieri 89’)
Hibernians: M. Jovicic, D. Vella, N. Radojevic (M. Dias 61’), M. Barbosa De Silveira, J. Mbong, J. Grech, J. Degabriele (M. Sahanek 34’), B. Kristensen, T. Marcolino (C. Zammit 89’), A. Agius, T. Fonseca
Imwissija: J. Walker 11’ (S), R. Martin 22’ (S), D. Vella 28’ (H), J. Mbong 41’ (H), M. Woo Ling 45’ (S)
Skorjaw: Adrian Borg 45+2’ (S), Marco Sahanek 75’ (H), Jake Grech 88’ (H)
Referee: Mario Apap
Assistenti Referees: Duncan Sultana, Thomas Debono
Il-Mument Plejer tal-logħba: Joseph Farrugia (St. Andrews)
Rapport: Luke Micallef
Lura fit-28 ta’ Settembru, fl-ewwel rawnd ta’ dan l-istaġun kienu l-Pawlisti li ħarġu fuq in-naħa rebbieħa bl-iskor ta’ 2-0 b’gowls ta’ Taylon Marcolino u Jurgen Degabriele.
Bidu movimentat bejn iż-żewġ timijiet, iżda ma wassal għall-ebda xutt lejn il-lasti tal-ebda tim. L-intenzjonijiet tal-Pawlisti kienu jidhru ċari fl-ewwel minuti tal-partita, li minn din il-logħba ma riedu xejn anqas minn tliet punti. St. Andrews iżda ma urew l-ebda biża’ mill-avversarji u kienu ddixiplinati fil-logħob tagħhom.
L-ewwel azzjoni denja ta’ nota waslet min-naħa ta’ St. Andrews. Fid-29 minuta logħob ingħataw free-kick ftit barra mill-kaxxa ta’ Marko Jovicic. Inkariga ruħu Joseph Farrugia li iżda ra l-ballun tiegħu jolqot il-mimduda wara li dan ixxellef minn Marko Jovicic.
Fil-31 minuta, aħbar ħażina għal Hibernians meta Jurgen Degabriele weġġa’ l-irkoppa u kellu jinħareġ mill-grawnd u ttieħed l-isptar. Minfloku daħal jilgħab l-Awstrijak Marco Sahanek. Fil-ħin żejjed tal-ewwel taqsima kienu St. Andrews li marru minn fuq. Minn korner ta’ Joseph Farrugia, daħal bir-ras ADRIAN BORG li tefa’ lil St. Andrew’s minn fuq fil-ħin tal-mistrieħ.
It-tieni taqsima rat lil Pawlisti joħolqu aktar ċansijiet ta’ skor. Fil-fatt fit-52 minuta minn xutt fil-baxx ta’ Taylon Marcolino, id-difensuri ta’ St. Andrews b’xi mod neħħew l-periklu minn quddiem Matthew Calleja Cremona.
Sitt minuti wara, xutt ta’ Taylon Marcolino għadda barra u fis-66 minuta free-kick ta’ Sahanek għadda ferm għoli. Erba’ minuti wara, Dunstan Vella daħal fil-kaxxa ta’ St. Andrews bil-ballun iżda Calleja Cremona kien attent u ħataf il-ballun biex neħħa l-periklu.
Hibernians ġabu d-draw kwarta mit-tmiem bi free-kick preċiż fil-baxx ta’ MARCO SAHANEK li għeleb lil Calleja Cremona. It-tim ta’ Raħal Ġdid kompla jagħfas għat-tieni gowl. Fis-86 minuta Matthew Woo Ling ra x-xutt tiegħu jiġi milqugħ faċilment minn Jovicic.
Il-Pawlisti skorjaw il-gowl importanti fit-88 minuta. Kross tajjeb ta’ Marcelo Dias ġab lil JAKE GRECH f’pożizzjoni tajba, bil-midfielder jiskorja l-gowl tar-rebħa li biha Hibernians telgħu fil-quċċata.
