It-telfa ta’ Los Angeles Lakers kontra Memphis Grizzlies kienet xorta pożittiva għal LeBron James hekk kif sar l-ewwel plejer li jinsab mal-aqwa 10 fil-listi ta’ kull żmien tal-NBA marbuta mal-punti skorjati kif ukoll mal-assists.
James li għandu 34 sena, diġà jinsab fil-ħames post fil-klassifika tal-aqwa skorer ta’ kull żmien, filwaqt li t-Tnejn filgħaxija daħal fl-10 post fil-lista tal-aktar assists fl-istorja. B’24 punt u 12-il rebound hu rreġistra wkoll id-79 triple-double biex tela’ fil-ħames post.
Minkejja s-suċċess personali, James ikkritika lil sħabu wara l-31 telfa tal-istaġun. “Fl-aħħar snin kulħadd dera għat-telfiet imma jien mhux imdorri. Jien qatt mhu se nkun komdu nitlef. Jekk għadek tħalli d-distrazzjonijiet iħallu effett fuq il-mod kif tilgħab, hu ħażin,” qal l-Amerikan. LeBron James ingħaqad ma’ Los Angeles Lakers f’Lulju tas-sena, minkejja li t-tim naqas li jasal sal-play-offs mill-2013.
Intant, James Harden temm is-sensiela ta’ 32 logħba konsekuttiva li tal-anqas skorja 30 punt, hekk kif spiċċa bi 28 punt fir-rebħa ta’ Houston Rockets fuq Atlanta Hawks 119-111. Din hi t-tieni l-itwal serje ta’ logħob bi 30 punt jew aktar fl-istorja tal-kampjonat. Ir-rekord hu ta’ Wilt Chamberlain b’65 logħba. Harden qal li kienet serje sabiħa iżda kien jaf li mhux se twassal biex tkun in-numru wieħed.
