SLIEMA WANDERERS……………. 3 MOSTA…………………. 1
Sliema: J. Galea (T. Aquilina 76’), M. Muchardi, K. Shaw, J. Mintoff, I. Varela, R. Fenech (A. Muscat 81’), N. Ashong, M. Sansone, C. Pani (J. Pearson 66’), S. Biancardi, Y. Marzouk
Mosta: A. Vella, R. Ekani, G. Cuomo, D. Bonnici (J. Brincat 65’), D. Xuereb (Z. Brincat 85’), R. Morisco, T. Farrugia, F. Franchini, A. Roach, D. Imeri, J. Cisotti
Skorjaw: Y. Marzouk 27’, 88’ (S), K. Shaw 35’ (S), R. Morisco 90’ (M)
Referee: Darryl Agius
Assistenti Referees: Thomas Debono, Duncan Spencer
In-Nazzjon Plejer tal-logħba: Younes Marzouk (Sliema Wanderers)
Attendenza: 340
Rapport: Luke Micallef
Is-serje pożittiva ta’ Mosta ġiet fi tmiemha lbieraħ kontra Sliema Wanderers b’telfa ta’ 3-1. Fl-aħħar erba’ konfronti tagħhom qabel din il-partita, Mosta kienu ġabru għaxar punti, b’rebħiet importanti u diffiċli kontra Tarxien, Ħamrun u Pietà u draw kontra Balzan.
B’din ir-rebħa s-Slimiżi ġabru tnax-il punt mill-aħħar sitt logħbiet. Fl-ewwel konfront ta’ dan l-istaġun bejn Sliema u Mosta, kienu s-Slimiżi li ħarġu fuq in-naħa r-rebbieħa bl-iskor ta’ 2-1.
Sliema ħarġu ftit aktar avventurużi mill-avversarji fl-ewwel minuti tal-ewwel taqsima. Fil-fatt fit-tielet minuta, John Mintoff baqa’ dieħel bil-ballun fil-kaxxa ta’ Mosta, iżda sab lill-gowlkiper ta’ Mosta, Andreas Vella attent u ħataf il-ballun minn saqajh.
Il-Mostin urew karattru u għalqu sew fid-difiża. Iż-żewġ naħat ħolqu wkoll diversi attakki, li iżda ma kinux perikolużi u ma wasslu għall-ebda azzjoni denja ta’ nota. Fis-sebgħa u għoxrin minuta Sliema fetħu l-iskor. Ħarba tajba ta’ YOUNES MARZOUK min-nofs il-grawnd, li partat il-ballun ma’ Ryan Fenech, bl-istess Marzouk jitfa’ fix-xibka Mostija.
Il-Wanderers irdoppjaw fil-35 minuta. Minn free-kick ta’ Marzouk fil-kaxxa tal-avversarji, id-difiża Mostija sabitha diffiċli sabiex ittajjar il-ballun li deher sejjer barra, li ġie f’saqajn KURT SHAW li b’xutt fil-baxx tefa’ fix-xibka. Mat-tisfira tat-tmiem it-taqsima, Ignacio Lucas Varela laqat il-lasta l-leminija Mostija b’daqqa ta’ ras b’saħħitha.
It-tieni taqsima naqqset sew fir-ritmu bi ftit azzjonijiet u b’ħafna logħob f’nofs il-grawnd. Fil-51 minuta, Claudio Pani xxuttja ċentrali b’Andreas Vella laqa’ faċilment. Għaxar minuti wara l-Mostin irreaġixxew b’xutt b’saħħtu ċentrali minn barra l-kaxxa, din id-darba minn Gianluca Cuomo, u l-gowlkiper ta’ Sliema laqa’ bla ebda diffikultà.
Din it-taqsima tkompliet pjuttost b’mod tedjanti bil-Wanderers komplew jikkontrollaw bla diffikultà. Kien fit-88 minuta li Sliema assiguraw mir-rebħa meta YOUNES MARZOUK ikkontrolla tajjeb qabel għeleb b’konklużjoni b’saħħitha lil Vella. Mosta naqqsu d-distakk fid-90 minuta bi free-kick mogħti minn RAFAEL MORISCO li xeħet wara l-gowlkiper sostitut Timothy Aquilina.
