FLORIANA………….. 0 BALZAN………………. 0
Floriana: I. Akpan, A. Cini, E. Ruiz, J. Pisani, A. Oyama, U. Arias, E. Cesani, B. Paiber (C. Borg 75’), K. Keqi (L. Vieira da Silva 86’), E. Herrera (D. Agius 79’), T. Galvao da Silva
Balzan: S. Mintoff, I. Bozovic, A. Kosoric, E. Serrano Valero, S. Bezzina, P. Fenech, U. Ljubomirac (A. Majdevac 68’), M. Lepovic (S. Cipriott 46’), S. Pisani (J. Grioli 84’), R. Correa, A. Effiong
Imwissija: E. Ruiz 28’, A. Cini 77’ (F), M. Lepovic 35’, S. Bezzina 61’ (B)
Referee: Stefan Pace
Assistenti Referees: Luke Portelli, William Debattista
Il-Mument Plejer tal-logħba: Enzo Ruiz (Floriana)
Attendenza: 780
Balzan u Floriana spiċċaw fi draw ta’ mingħajr gowls f’logħba diżappuntanti u tista’ titqies waħda mill-agħar f’dan l-istaġun. Dan ir-riżultat jikkuntenta aktar lil Floriana li tbiegħdu punt aktar fit-taqtigħa li jevitaw il-play-off.
Fuq in-naħa l-oħra, Balzan tilfu opportunità oħra li jkomplu jersqu lejn ir-raba’ post li jfisser post fl-Ewropa. It-tim ta’ Jacques Scerri naqas li jimponi l-logħba u joħloq okkażjonijiet ta’ skor, prestazzjoni li tinkwieta lill-kowċ ta’ Balzan.
Floriana ħolqu l-ewwel periklu wara 12-il minuta b’xutt mill-ewwel ta’ Enzo Ruiz li ta l-illużjoni tal-gowl iżda x-xutt għadda ftit barra. Żewġ minuti wara, Sean Mintoff blokka tajjeb xutt minn pożizzjoni ċentrali ta’ Brandon Paiber.
Fis-16-il minuta, daqqa ta’ ras ta’ Milos Lepovic għaddiet barra wara kross mix-xellug ta’ Alfred Effiong. Sa tmiem l-ewwel taqsima, ebda plejer ma kien ta’ periklu serju għall-gowlkiper avversarju.
Floriana kellhom ċans tajjeb li jiftħu l-iskor fil-50 minuta meta Kristian Keqi rċieva l-ballun f’pożizzjoni tajba iżda x-xutt djagonali fil-baxx tiegħu għadda barra.
Tliet minuti wara, Balzan ingħataw free-kick indirett fil-kaxxa wara li r-referee Stefan Pace ġġudika fawl perikoluż fil-kaxxa ta’ Jurgen Pisani fuq Aleksandar Kosoric. Mill-free-kick, ix-xutt ta’ Ricardo Correa ħabat mal-barriera. L-andament tal-logħba kompla jkun ta’ livell baxx hekk kif il-pussess tal-ballun beda jintilef malajr miż-żewġ timijiet. Fit-73 minuta, Ricardo Correa prova b’xutt fil-baxx li faċli għal Akpan biex isalva.
Fuq in-naħa l-oħra, is-sostitut Clyde Borg ra x-xutt minn barra l-kaxxa jgħaddi ftit għoli. Ċans tad-deheb għal Balzan fis-87 minuta meta l-ewwel kien Correa li laqat il-wieqfa u mir-rebound Aleksandar Kosoric xeħet inkredibbilment għoli.
Floriana kienu ħasbu li skorjaw il-gowl tar-rebħa fid-90 meta l-ballun spiċċa fix-xibka wara azzjoni ta’ korner, iżda r-referee Stefan Pace għal xi raġuni ordna fawl għal Balzan. Ftit wara, Floriana pprotestaw għal penalty iżda r-referee ħalla l-logħob għaddej.
