GŻIRA UNITED……….. 3 SENGLEA ATHLETIC……….. 1
Gżira: J. Haber, R. Briffa (J. Mengolo 31’), C. Gatt Baldacchino, R. Soares (G. Conti 46’), M. Beerman, Z. Scerri, N. Muscat, E. Bilbao Zarate, A. Cohen (L. Moad 90’), J. Corbalan, H. Garba
Senglea: M. Farrugia, C. Sammut, E. Sidqy (G. Camilleri 64’), A. Mrsulja, J. Leyton, Z. Cassar (K. Cutajar 77’), D. Venancio, M. Garcia, R. Silva Santos, L. Grech, A. Caseres
Imwissija: Z. Scerri 14’ (G), G. Leyton 44’ (S)
Skorjaw: H. Garba 15’, 78’, J. Mengolo 46’ (G), A. Caseres 44’ (S)
Referee: Fyodor Zammit
Assistenti Referees: Duncan Sultana, Dusan Petrovic
Il-Mument Plejer tal-logħba: Haruna Garba (Gżira United)
Attendenza: 455
Senglea Athletic sofrew it-tieni telfa konsekuttiva wara li kienu megħluba minn Gżira United 3-1, biex b’hekk il-Gżirjani saħħew it-tielet post fil-klassifika. Ir-rebħa ta’ Gżira kienet meritata iżda missielta.
It-tim tal-Isla offra oppożizzjoni denja speċjalment fl-ewwel taqsima, iżda wara li Gżira reġgħu marru minn fuq kmieni fit-tieni taqsima, ħadu r-riedni f’idejhom. Fatt interessanti kien li l-kowċ Gżirjan Jesmond Zerafa beda bi tliet plejers barranin biss mill-bidu.
Senglea setgħu marru minn fuq wara sitt minuti meta Augusto Caseres naqas li jkompli għal ġewwa kross ta’ Matias Garcia. Iżda fl-ewwel attakk serju tagħhom, Gżira fetħu l-iskor wara kwarta b’xutt fil-baxx ta’ HARUNA GARBA li għeleb lil Matthew Farrugia.
Il-Maroons setgħu rduppjaw fis-26 minuta b’korner insidjuż ta’ Juan Corbalan iżda d-daqqa ta’ ras ta’ Rodolfo Soares għaddiet fuq il-lasta. Gonzalo Leyton mar qrib id-draw fis-37 minuta b’xutt destinat għal-lasta li kien blokkat f’korner minn Zachary Scerri.
Dan kien il-preludju tal-gowl tad-draw li wasal fl-44 minuta bi kross ta’ Arian Mrsulja lejn AUGUSTO CASERES li għeleb lil Justin Haber b’daqqa ta’ ras b’saħħitha.
Senglea gawdew biss id-draw fil-ħin tal-mistrieħ għaliex Gżira reġgħu marru minn fuq ftit sekondi wara l-ftuħ tat-tieni taqsima. Is-sostitut JUSTIN MENGOLO għadda bil-ġiri avversarju tiegħu fil-kaxxa u għeleb lil Farrugia b’xutt minn pożizzjoni angolata.
Ir-risposta tal-formazzjoni mmexxija minn Enzo Potenza waslet fis-57 minuta iżda din id-darba Caseres naqas li jikkontrolla l-ballun fil-kaxxa. Arian Mrsulja kien providenzjali kwarta mit-tmiem meta biegħed il-ballun qabel daħal fix-xibka wara li Garba kien għeleb lil Farrugia.
Gżira assiguraw it-tliet punti tliet minuti wara meta Mengolo avvanza u tefa’ kross fil-baxx lejn HARUNA GARBA li kompla għal ġewwa. L-unika tentattiv ta’ Senglea sa tmiem il-logħba kien free-kick ta’ Diego Venancio fid-89 minuta li għadda ftit barra.
