F’diskors fis-Sessjoni Plenarja fil-Parlament Ewropew fi Strasburgu, il-Kap tad-Delegazzjoni tal-Partit Nazzjonalista fil-Parlament Ewropew David Casa talab lill-Parlament Ewropew, lill-Kummissjoni Ewropea u lill-Kunsill tal-Unjoni Ewropea biex jitolbu lill-awtoritajiet Torok biex iwaqqgħu l-akkużi kontra l-ġurnalista investigattiva Pelin Ünker. “Ma nistgħux nibqgħu siekta quddiem dawn l-inġustizzji,” qal l-MEP Casa.
Il-ġurnalista Torka Pelin Ünker qed tiffaċċja sentenza ta’ ħabs ta’ 13-il xahar wara li rrapportat fatti dwar il-Paradise Papers, li jagħmlu referenza għal qraba ta’ politiċi fl-ogħla livell tal-poter fit-Turkija. “Pelin hi omm żagħżugħa. Jekk is-sentenza tkun infurzata, hi se jkollha tissepara minn mat-tarbija li għandha. Din hi amministrazzjoni krudili. Il-poplu Tork jixraqlu aħjar,” insista l-MEP Casa.
Wara li żarha u lit-tim legali tagħha f’Istanbul, David Casa stieden lil Ünker f’Malta għal attività li qed jorganizza nhar is-Sibt li ġej, li se tinkludi l-parteċipazzjoni tas-soċjetà ċivili Maltija. Hi se tattendi wkoll il-vġili ta’ Daphne Caruana Galizia fil-Belt Valletta. Dwar dan, l-MEP Casa għamel appell ieħor lill-awtoritajiet Maltin biex, kemm jista’ jkun malajr, joħorġu l-viża għal Pelin Ünker u l-familja tagħha biex tkun tista’ tiġi żżur Malta aktar tard din il-ġimgħa.
“Turkey 🇹🇷 is further away from EU 🇪🇺 accession today than when it applied so many years ago. There can be no real democracy without media freedom,” MEP @davidcasamep said, as he made reference to @pelinunker's case.
Read the press release 👉 https://t.co/XTVCNi2cqJ pic.twitter.com/izzQFB8zX7
— EPP_MT 🇲🇹 (@EPP_MT) March 12, 2019
Fid-diskors tiegħu, l-MEP Casa għamel referenza wkoll għall-applikazzjoni tat-Turkija għal sħubija sħiħa fl-Unjoni Ewropea. “Taħt din l-amministrazzjoni, it-Turkija tinsab aktar ‘il bogħod mill-adeżjoni fl-UE milli kienet dakinhar li applikat bosta snin ilu. Ma jistax ikun hemm demokrazija vera mingħajr il-libertà tal-midja,” qal Casa, filwaqt li irrefera għall-każ ta’ Ünker.
Pelin Ünker tifforma parti mill-Konsorzju Internazzjonali ta’ Ġurnalisti Investigattivi.
Inaċċettabbli li l-ġurnalisti fit-Turkija qed jiġu trattati ħażin – David Casa
