HIBERNIANS……………. 2 SLIEMA WANDERERS……………… 2
Hibernians: M. Jovicic, M. Dias (R. Tardini 83’), A. Agius, M. Barbosa, N. Radojevic, D. Vella, B. Kristensen, J. Mbong, J. Grech, M. Sahanek, T. Fonseca (T. Tabone Desira 92’)
Sliema: T. Aquilina, M. Sansone, K. Shaw, S. Biancardi, N. Ashong, M. Muchardi, R. Fenech (J. Pearson 85’), C. Pani, J. Mintoff (K. Amehi 75’), Y. Marzouk, I. Varela
Imwissija: J. Grech 51’, T. Fonseca 61’, N. Radojevic 86’ (H), Y. Marzouk 66’, J. Mintoff 73’ (S)
Tkeċċa: N. Radojevic 87’ (H)
Skorjaw: I. Varela 21’, Y. Marzouk 41’ (S), J. Mbong 53, J. Grech 69’ pen (H)
Referee: Fyodor Zammit
Assistenti Referees: Roberto Vella, Duncan Sultana
In-Nazzjon Plejer tal-logħba: Ryan Fenech (Sliema Wanderers)
Attendenza: 326
Hibernians kellhom bżonn rimonta oħra biex jevitaw telfa iżda għat-tieni darba fi ftit jiem spiċċaw fi draw. B’hekk il-vantaġġ ta’ żewġ punti li kellhom jista’ jinbidel f’żewġ punti żvantaġġ jekk Valletta jirbħu llum kontra Mosta.
Ir-riħ ikkundizzjona l-konfront, b’Sliema jkunu favur ir-riħ u jiskorjaw darbtejn, b’Hibernians jagħmlu l-istess fit-tieni taqsima. Hibernians kellhom nieqes lis-sospiż Taylon Marcolino filwaqt li Sliema ħassew in-nuqqas tal-gowlkiper regolari Jake Galea li jinsab imweġġa’.
Sliema fetħu l-iskor fl-ewwel azzjoni denja wara 21 minuta meta minn korner, Younes Marzouk qassam lejn Michele Sansone li kompla lejn Ryan Fenech, midfielder jitfa’ kross qasir lejn IGNACIO VARELA li antiċipa tajjeb biex għeleb lil Marko Jovicic b’xutt mill-ewwel mill-kaxxa ż-żgħira.
Ir-reazzjoni ta’ Hibernians kienet fjakka bil-gowlkiper Timothy Aquilina ftit ikun fl-azzjoni. Il-ftit tentattivi ta’ Hibernians ma nkwadrawx il-lasta Slimiża. It-tim ta’ Stefano Maccoppi rdoppja l-vantaġġ fil-41 minuta bi kross-shot imdawwar mil-linja xellugija ta’ YOUNES MARZOUK li dar ftit bir-riħ u spiċċa biex qabeż lil Jovicic fuq it-tieni lasta.
Is-Slimiżi setgħu saħansitra għalqu t-taqsima bit-tielet gowl fl-44 minuta meta din id-darba kien Ryan Fenech li prova b’xutt fil-baxx minn barra l-kaxxa li kien salvat b’diffikultà minn Jovicic.
Minbarra li kienu minn taħt, Hibernians kellhom ir-riħ favur tagħhom fit-tieni taqsima. L-ewwel azzjoni waslet fit-48 minuta bi kross mil-lemin ta’ Marcelo Dias lejn Joseph Mbong li daħal tajjeb iżda kellu l-konklużjoni mill-viċin salvata tajjeb minn Aquilina.
Hibernians daħlu fil-logħba fit-53 minuta meta JOSEPH MBONG qabad lil Aquilina mhux f’postu u skorja b’xutt fuq l-ewwel lasta. Tliet minuti wara, Sahanek prova b’xutt li ta l-illużjoni tal-gowl iżda l-konklużjoni fil-baxx għaddiet ftit barra, biex mas-siegħa logħob xutt ta’ Tiago Fonseca ħabat man-naħa ta’ barra tax-xibka.
Il-Pawlisti ngħataw penalty fit-68 minuta meta l-gowlkiper Slimiż Timmy Aquilina ħareġ tard u spiċċa biex waqqa’ lil Jake Grech, bir-referee Fyodor Zammit jordna penalty li JAKE GRECH bagħat lill-gowlkiper in-naħa l-oħra biex skorja l-gowl tad-draw. L-istess Grech prova bi free-kick fl-74 minuta li għadda ftit għoli.
Sliema kellhom opportunità rari fis-77 minuta meta Varela rċieva ballun f’pożizzjoni tajba u prova jqabbeż il-ballun iżda Jovicic ħareġ tajjeb u blokka fil-ħin. Ta’ dan iċ-ċans kienu se jpattu qares għax fl-attakk sussegwenti Hibernians kienu għoddhom marru fil-vantaġġ meta Jake Grech ikkrossja mil-lemin lejn l-iżmarkat Tiago Fonseca iżda l-konklużjoni mill-ewwel minkejja li kienet b’saħħitha, stampat mal-mimduda.
Hibernians kellhom ikomplu l-logħba b’raġel anqas fis-87 minuta meta Nemanja Radojevic irċieva żewġ karti sofor fi ftit sekondi wara żewġ daħliet tard. Sliema kellhom iċ-ċans li jiskorjaw il-gowl tar-rebħa fid-89 minuta iżda Sansone xxuttja barra minn qagħda tajba.
