MOSTA………………… 0 VALLETTA………….. 1
Mosta: Y. Moto, F. Franchini, T. Farrugia, R. Morisco, D. Bonnici, G. Cuomo, D. Xuereb, J. Brincat (Z. Brincat 69’), J. Cisotti, A. Roach, D. Angan N’Guessan
Valletta: H. Bonello, S. Borg, J. Caruana, R. Camilleri, J. Zerafa, A. Monticelli (N. Pulis 85’), S. Malano, M. Alba (J. Borg 74’), B. Gavrila (E. Pena Beltre 68’), M. Fontanella, B. Kaljevic
Imwissija: A. Roach 37’, J. Cisotti 79’ (M), A. Monticelli 74’, J. Zerafa 74’ (V)
Skorjaw: M. Alba 6’ (V)
Referee: Trustin Farrugia Cann
Assistenti Referees: Thomas Debono, Theodore Zammit
In-Nazzjon Plejer tal-logħba: Miguel Alba (Valletta)
Attendenza: 555
Valletta sabuha diffiċli iżda finalment ħadu dak li riedu. B’dawn it-tliet punti huma qabżu lil Hibernians fil-quċċata tal-klassifika u b’hekk issa jiddependi minnhom jekk ikunux huma li jirbħu l-kampjonat.
Ħafna kienu qed jaħsbu li wara li skorjaw kmieni fil-logħba, Valletta kienu se jiġru bil-logħba, iżda Mosta taw battikata lit-tim ta’ Danilo Doncic. Il-kowċ Belti kellu jgħaddi mingħajr plejer Rowen Muscat, b’Antonio Monticelli jibda għall-ewwel darba mill-bidu kemm ilu li ngħaqad ma’ Valletta.
Il-gowl li spiċċa biex iddeċieda l-logħba wasal wara biss sitt minuti. Kien kross mix-xellug ta’ MIGUEL ALBA li l-gowlkiper Yves Moto ma żammx, bil-ballun jibqa’ dieħel fix-xibka. Mosta wieġbu b’daqqa ta’ ras ta’ James Brincat li falliet il-mira.
Valletta kellhom żewġ okkażjonijiet, l-ewwel fis-17-il minuta meta Moto laħaq qabel Fontanella wara kross fil-baxx ta’ Gavrila, biex man-nofs siegħa logħob Bogdan Gavrila mar viċin b’xutt imdawwar li għadda ċentimetri barra.
Ċans ieħor għal Valletta fil-41 minuta b’korner ta’ Gavrila jsib lil Bojan Kaljevic li ra d-daqqa ta’ ras tiegħu tmiss il-lasta qabel marret barra. Mosta fallew okkażjoni tad-deheb ftit wara meta Duane Bonnici qassam tajjeb lejn James Brincat iżda minn qagħda ideali spara għoli.
It-tieni taqsima kienet ftit differenti mill-ewwel waħda hekk kif Mosta żiedu l-isforzi tagħhom biex jevitaw it-telfa. Fis-57 minuta, Akeem Roach prova minn barra l-kaxxa iżda x-xutt għadda għoli.
Fl-64 minuta, Fontanella impenja lil Moto b’xutt fil-baxx iżda l-gowlkiper Mosti salva mingħajr problemi. Fl-aħħar minuti, Mosta ppressaw lid-difiża ta’ Valletta iżda l-pussess tagħhom ftit sarraf f’konklużjonijiet lejn Henry Bonello, b’Doncic idaħħal ukoll lil Enmy Pena Beltre u Jean Borg fl-aħħar 20 minuta biex isaħħaħ il-vantaġġ li Valletta kellhom.
