GŻIRA UNITED………………. 5 PIETA’ HOTSPURS ……………… 2
Gżira: J. Haber, N. Muscat (R. Briffa 35’), Z. Scerri, R. Soares (F. Barbosa 61’), A. Cohen, J. Corbalan, C. Gatt Baldacchino, G. Conti, S. Borg, J. Mengolo (M. Beerman 64’), H. Garba
Pietà: N. Vella, T. Ose, N. Pace Cocks (G. Kekua 75’), D. Agius, J. Busuttil, N. Pisani (J. Ghio 71’), G. Mensah, J. Artiaga, C. Grech, S. Radovanovic (J. Scicluna 46’), A. Macedo
Imwissija: A. Machedo Neto 34’, N. Pace Cocks 54’ (P)
Skorjaw: G. Mensah 1’, N. Pisani 60’ (P), H. Garba 7’, 57’, J. Mengolo 36’, 45’, 63’ (G)
Referee: Ishmael Barbara
Assistenti Referees: Edward Spiteri, Darko Stankovic
Il-mument Plejer tal-logħba: Justin Mengolo (Gżira United)
F’logħba movimentata u b’ħafna gowls, Gżira faċilment għelbu lil Pietà Hotspurs bl-iskor ta’ 5-2. B’din ir-rebħa Gżira kkonsolidaw posthom fit-tielet post, filwaqt li l-inkwiet għal Pietà kompla jiżdied hekk kif baqgħu ankrati fil-qiegħ tal-klassifika b’għaxar punti.
Il-logħba bdiet b’ritmu għoli. Fil-fatt fl-ewwel minuta u fl-ewwel azzjoni tal-partita kienu Pietà li marru fil-vantaġġ. Pass ħażin ta’ Clifford Gatt Baldacchino ġie nterċettat minn GABRIEL MENSAH li fil-baxx għeleb lil Justin Haber.
Pietà komplew jagħfsu b’attakki kontinwi, iżda kienu l-Gżirjani li ġabu l-gowl tad-draw. Nikolai Muscat, bir-ras għadda l-ballun lil HARUNA GARBA li fil-baxx tefa’ wara Nicholas Vella.
Fil-15-il minuta reġa’ kien protagonist Garba li iżda tilef opportunità tad-deheb sabiex jagħmel id-doppjetta personali, wara li ra x-xutt tiegħu jgħaddi ftit barra.
Fis-36 minuta, Gżira marru fil-vantaġġ. Kien Garba li għadda l-ballun lejn JUSTIN MENGOLO li baqa’ tiela’ bil-ballun u faċilment tefa’ l-ballun wara Vella. Fl-aħħar azzjoni tal-ewwel taqsima, Gżira għamluhom 3-1. Kross mix-xellug li ġie għand JUSTIN MENGOLO li bir-ras tefa’ wara Vella.
It-tieni taqsima kompliet bl-istess ritmu tal-ewwel waħda. Fil-fatt fis-47 minuta, Gżira kienu viċin li jagħmluhom erbgħa. Andrew Cohen ra x-xutt tiegħu jiġi mtajjar minn fuq il-linja bir-ras minn Christian Grech.
Għaxar minuti wara, wasal ir-raba’ gowl ta’ Gżira. Wara żball fid-difiża tal-Hotspurs, approfitta HARUNA GARBA li faċilment tefa’ wara Vella. Tliet minuti wara s-siegħa logħob, Pietà naqqsu d-distakk permezz ta’ xutt fil-baxx ta’ NICHOLAS PISANI.
Għaddew tliet minuti oħra u Gżira skorjaw is-seba’ gowl tal-logħba. Wara li Garba laqat il-lasta, il-ballun ġie f’saqajn JUSTIN MENGOLO li b’xutt b’saħħtu tefa’ fix-xibka għat-tielet gowl personali.
Il-Hotspurs komplew jagħfsu biex ifittxu l-gowl iżda l-isforzi tagħhom ma sarrfu fl-ebda gowl biex b’hekk Gżira pattew għal punti li tilfu fl-ewwel rawnd wara li kienu spiċċaw 1-1.
(Ritratti: Joseph Galea)
