Hekk kif ninsabu biss ftit ġimgħat ‘il bogħod mill-Ġimgħa Mqaddsa, il-Kap tal-Partit Nazzjonalista Adrian Delia ġie ppreżentat b’żewġ kotba dwar statwi u vari li juru l-passjoni ta’ Sidna Ġesù Kristu.
Il-ktieb bl-isem ta’ ‘Redentur’,kien preżentat lil Adrian Delia mill-editur Dun Jonathan Farrugia u mill-awturi Sandro Debono, Valentina Lupo u Maria Grazia Zenzani, kif ukoll mill-fotografu Joe P. Borg. Preżenti kien hemm ukoll il-Ko-ordinatur tal-PN għall-Kunsilli Lokali Charles Bonello.
Dan il-ktieb se jgħin lill-qarrej biex jifhem ir-rikezza fid-dettall tar-Redentur tal-Isla. Midsea Books flimkien mal-Kapitlu Kolleġġjata tal-Isla ħarġu dan il-ktieb biex jagħtu l-istorja dettaljata ta’ din l-ikona ta’ Kristu Redentur.
Il-ktieb jinkludi riċerka dettaljata u dokumentazzjoni, kif ukoll ir-rapport tekniku tal-proġett tal-konservazzjoni ta’ din il-vara. Fl-istess ktieb hemm informazzjoni dwar is-sinifikat ta’ din il-vara mhux biss fil-Knisja iżda wkoll waqt il-purċissjoni tal-Ġimgħa l-Kbira.
Il-Kap tal-Partit Nazzjonalista kiteb introduzzjoni għal dan il-ktieb fejn faħħar l-inizjattiva għall-pubblikazzjoni tiegħu kif ukoll għax-xogħol li sar fuq din l-istatwa li tiqies bħala waħda mirakoluża u devota minn ħafna Maltin.
Fi żjara oħra, Mario Cocker ippreżenta l-ktieb tiegħu lill-Kap tal-Partit Nazzjonalista. Passjoni – Merging Art and Faith huwa ktieb mimli ritratti ta’ statwi tal-passjoni meħuda mill-fotografu Mario Cocker. Dan il-ktieb, b’kitba kemm bil-Malti u bl-Ingliż ta’ Mario Colerio u b’pubblikazzjoni ta’ Horizon, jitratta fotografija tal-arti sagra li juru l-isbuħija ta’ statwi tal-Ġimgħa l-Kbira li għandna f’pajjiżna.Mario Cocker ilu għal dawn l-aħħar ħmistax-il sena jdur divrsi knejjes sabiex jieħu ritratti ta’ statwi tal-Ġimgħa l-Kbira li jsebbħu l-knejjes Maltin f’dan iż-żmien sagru tas-sena.
