Ir-rivalità bejn il-ġirien San Ġiljan TUM Invest u Neptunes Leo Vegas se tkompli llum hekk kif it-tnejn se jippruvaw jiksbu rebħa importanti li biha jitilgħu waħedhom fl-ewwel post. Iż-żewġ timijiet rebħu l-ewwel tliet logħbiet tagħhom. San Ġiljan għelbu lil Sirens, Sliema u Exiles filwaqt li Neptunes rebħu kontra Exiles, Sirens u Valletta.
San Ġiljan jittamaw li l-captain Matthew Zammit ikun fil-forma tas-soltu filwaqt li plejers bħal Dino Zammit u Ben Plumpton ikunu aktar preċiżi fl-attakk. Neptunes jittamaw li ż-żgħażagħ tagħhom ikomplu jispikkaw hekk kif għajr il-captain Niki Lanzon u l-gowlkiper Alan Borg Cole, it-tim ta’ Neptunes hu bbażat fuq iż-żgħażagħ. Fosthom qed jispikkaw Jake Muscat u Nikolai Zammit.
Fil-logħba l-oħra tal-lum, mill-Ewwel Diviżjoni Birżebbuġa u Otters jilagħbu kontra xulxin. Birżebbuġa kisbu l-ewwel rebħa jumejn ilu kontra Ta’ Xbiex u għandhom il-mira li jippruvaw ikunu r-rebbieħa tad-Diviżjoni. Otters fuq in-naħa l-oħra għandhom tim b’diversi żgħażagħ li bdew jieħdu l-esperjenza iżda fiż-żewġ ħarġiet li kellhom sa issa kienu ta’ sfida tajba għall-avversarji.
Kampjonat Premier
Illum
San Ġiljan v Neptunes 7.30pm
Għada
Sirens v Valletta 4.15pm
Sliema v Exiles 5.30pm
Kampjonat I Diviżjoni
Illum
Birżebbuġa v Otters 6.15pm
Għada
Marsaskala v Ta’ Xbiex 3.00pm
