Laura Paffenholz, Ġermaniża ta’ 23 sena tilfet ħajjitha wara li trakk baqa’ għaddej minn fuqha hekk kif waqgħet minn fuq mutur.
L-inċident seħħ ilbieraħ filgħaxija għall-ħabta ta’ ħdax u nofs fi Vjal Santa Luċija f’Raħal Ġdid.
Kien ġuvni ta’ 23 sena miż-Żejtun li kien qed isuq il-mutur li tilef il-kontroll tiegħu bil-konsegwenza t-tnejn li huma waqgħu minn fuq il-mutur. F’dak il-ħin, trakk li kien qed isuq eżatt wara l-mutur laqat lit-tfajla bil-konsegwenza li ntrifset taħtu.
Fuq il-post issejjaħ tim mediku mill-isptar Mater Dei iżda it-tfajla li kienet passiġiera ġiet ċċertifikata mejta fuq il-post.
Is-sewwieq tal-mutur weġġa’ ħafif.
Dwar dan il-każ inħatret inkjesta maġisterjali mmexxija mill-Maġistrat tal-Għassa bl-investigazzjonijiet qed jitmexxew mill-Pulizija tad-Distrett ta’ Raħal Ġdid .
