Żewġ persuni tilfu ħajjithom u żewġ persuni oħra sofrew feriti gravi f’inċident li seħħ illejla fi Triq Buqana fil-Mosta, direzzjoni lejn l-Imġarr.
Jirriżulta li fl-inċident, li seħħ ftit wara d-9pm, kienu nvoluti għadd ta’ karozzi – numru ta’ persuni nqabdu fil-vetturi li kienu fihom, fosthom tfal.
Net News hu infurmat li l-inċident kien ikkawżat minn ħabta head-on bejn karozza Audi u vettura tat-tip Maruti. Iż-żewġ nisa fil-fatt kienu s-sewwieqa tal-Maruti, u passiġġiera.
Kawża tal-impatt, il-karozza Audi spiċċat fil-gandott fond, fejn għadhom għaddejjin xi xogħolijiet, fuq in-naħa tax-xellug tat-triq.
Fil-post, intervjenew immedjatament Pulizija, membri mid-Dipartiment tal-Protezzjoni Ċivili u numru ta’ timijiet mediċi. Preżenti kien hemm ukoll għadd ta’ Uffiċjali ta’ Transport Malta.
Ilbieraħ filgħodu, karozza sportiva wkoll waqgħet fl-istess żona fejn seħħ l-inċident. Madankollu, fortunatament, ħadd ma weġġa’ f’dak l-inċident.
L-inċident tqies bħala wieħed maġġuri, anke minħabba li staff ta’ Mater Dei issejħu għax-xogħol biex jassistu .
Fil-fatt, fuq Facebook, it-tmexxija tal-Isptar Mater Dei appellat lin-nies biex ma jmorrux fid-Dipartiment tal-Emerġenza jekk mhux meħtieġ.
Dwar l-inċident tal-lum, infetħet Inkjesta Maġisterjali, b’diversi esperti tal-Qorti qed jassistu.A
//= $special ?>