Id-Deputat Mexxej Nazzjonalista David Agius qal li bħalma l-poplu qed jinduna, l-Oppożizzjoni hi kommessa li tibqa’ tiddiskuti l-kwistjonijiet ewlenin li qed jolqtu lill-Maltin fil-ħajja ta’ kuljum tagħhom… se nibqgħu nitkellmu fuq il-bread–and-butter issues… it-tajjeb qed ngħidulu tajjeb u l-ħażin qed niġġildulu bis-sħiħ, u għalhekk m’aħniex se ninsew jew inħallu barra l-korruzzjoni li nawret l-istituzzjonijiet ta’ pajjiżna.
Tenna li aħna kommessi wkoll li nikkritikaw iżda fl-istess waqt nipproponu triq ’il quddiem biex il-Gvern jirranġa s-sitwazzjoni fejn tidħol il-Governanza tajba u l-ġustizzja. Irridu li ssir il-ġustizzja u li jkun jidher li qed issir… irridu li titħaddem il-Governanza tajba u li jkun jidher li qed titħaddem.
Iżda l-Oppożizzjoni mhix l-unika waħda li qed tiġbed l-attenzjoni tal-gvern dwar is-sitwazzjoni gravi li jinsab fiha pajjiżna. Hemm ir-Rapport tal-GRECO: il-Grupp tal-Istati Kontra l-Korruzzjoni, Hemm ir-Rapport tal-Kummissjoni Venezia, Hemm ir-Rapport tal-Moneyval tal-Kunsill tal-Ewropa, Hemm id-dikjarazzjonijiet fil-Parlament Ewropew, Hemm bosta deċiżjonijiet tal-Qorti Maltija.
Agius qal li hemm bosta dikjarazzjonijiet tal-Imħallef Emeritus Giovanni Bonello, hemm id-dikjarazzjonijiet tal-Fond Monetarju Internazzjonali,
Hemm id-dikjarazzjoni ċara tas-CEO tal-HSBC Malta, hemm l-istqarrijiet ta’ Transparency International, hemm l-editorjali fil-gażżetti… tat-Times, tal-Maltatoday, tal-Independent.
Agius qal li l-lista ma tispiċċax, u mpossibbli f’dawn il-ftit minuti nidħol fir-rapporti u fid-dikjarazzjonijiet kollha waħda waħda, u allura ddeċida li jiffoka fuq is-sejbiet u dak li hemm miktub fir-Rapport tal-GRECO li ġie ppubblikat dan l-aħħar.
Dan ir-rapport jinkwetana qal Agius, …hu rapport estensiv, dettaljat u jolqot il-musmar fuq rasu. U bħala Oppożizzjoni rridu li l-gvern jara x’qed jistqarr dan ir-rapport u jagħmel l-emendi fil-liġijiet u l-bidliet meħtieġa biex jisma’ minn dak li qed jgħidulu.
Il-Partit Nazzjonalista għal hekk ried li pajjiżna jidħol fl-Unjoni Ewropea …biex ikunu tassew Ewropej u biex l-istituzzjonijiet ta’ pajjiżna jiffunzjonaw kif il-poplu jistenna. Min-naħa l-oħra l-gvern Laburista qed jaħdem biex inawwarhom, u biex itappan u jherri r-reputazzjoni li rnexxielha tikseb Malta matul is-snin ta’ qabel b’ħidma bil-għaqal u b’tant attenzjoni.
Konna pijunieri f’dan il-qasam qal il-kelliem, konna eżemplari fl-Ewropa u fid-dinja. Mhux ta’ b’xejn imbagħad li lill-Ministru tal-Finanzi jsemmulu l-korruzzjoni kull fejn imur madwar id-dinja. Mhux ta’ b’xejn li lill-Ministru tat-Turiżmu jsemmulu l-Panama Papers kull fejn iżur.
Tkellem fuq ir-Rapport tal-GRECO qed jgħidilna, li l-istituzzjonijiet li huma tajbin fuq il-karta u mil-lat organizzattiv, iżda mbagħad jiddependu fuq il-politiċi. Nafu li l-ħatriet fil-ġudikatura jiddependu mill-Prim Ministru, l-istess il-ħatriet fil-Korp tal-Pulizija, u li l-Avukat Ġenerali minbarra li hu l-avukat tal-gvern, hu wkoll il-Prosekutur Pubbliku u l-President tal-FIAU: il-Financial Intelligence Analysis Unit ta’ pajjiżna.
Agius fakkar kif il-Gvern tal-Labour qed jagħmel kapital minn fuq dan id-difett fil-liġijiet ta’ pajjiżna għall-gwadann politiku u partiġġjan tiegħu.
Imbagħad hemm aspett ieħor li jsemmi r-Rapport tal-GRECO: l-abbuż sfaċċat bil-positions of trust li sploda mill-2013 ’il hawn.
Mhuwiex aċċettabbli li l-pożizzjonijiet ta’ uffiċjali pubbliċi li m’għandhomx irwol li jeħtieġ il-fiduċja speċifika tal-Ministru kkonċernat, jimtlew minn persuni bħala positions of trust. L-uffiċjali li jitqabbdu bil-positions of trust jinsabu f’pożizzjoni fejn jekk ma jaqblux mal-politiku li tahom il-pożizzjoni, ma jistgħux jitkellmu. Barra minn hekk, dawn jafu li jekk jinbidel il-gvern jew il-Ministru, il-post tagħhom jinsab f’riskju li jintilef.
Il-Viċi Kap Nazzjonalista qal li mbagħad hemm il-kwistjoni tas-Segretarji Permanenti, pożizzjonijiet li ġew poliċizzati għalkollox wara l-elezzjoni tal-2013. Saħansitra wħud mis-Segretarji Permanenti jxejru l-bandiera tal-Labour fil-miftuħ.
U hemm il-bosta kwistjonijiet li jsemmi r-rapport b’rabta mal-Korp tal-Pulizija, li tilef l-avvanz fil-karriera bbażat fuq il-mertu, u minflok avvanz ieħor poliċizzat.
U għalhekk tal-Oppożizzjoni kommessi wkoll li ngħinu lill-gvern biex jieqaf jagħmel din il-ħsara u flimkien nerġgħu nsaħħu l-istituzzjonijiet u nagħtu reputazzjoni tajba lil Malta fil-pjattaforma dinjija.
“Lesti li npoġġu madwar il-mejda għad-diskussjoni għax pajjiżna qed jitkarrab: għal istituzzjonijiet u regolaturi li jiffunzjonaw, għal sistema ġudizzjarja soda u għal Avukat Ġenerali li jagħmel xogħlu kif mistenni u mitlub mil-liġi.
Lesti li npoġġu madwar il-mejda u niddiskutu r-rakkomandazzjonijiet ta’ dan ir-rapport għall-ġid nazzjonali u nittamaw li hemm ir-rieda min-naħa tal-gvern biex jingħaqad fid-diskussjoni magħna u jimplimenta dak li hu meħtieġ.
