L-Ispanjol Pedro Lopez rebaħ it-tellieqa tal-House of Sport 10k Series li saret il-Ħadd li għadda. B’kollox ħadu sehem 350 atleta. Għalkemm il-pjanijiet oriġinali tat-tellieqa kienu se jaraw it-tellieqa tibda u tispiċċa quddiem il-bieb tal-Imdina, xogħlijiet fit-toroq tal-viċinanza raw bidla żgħira fir-rotta li saret fl-inħawi ta’ Rabat u Dingli.
Pedro Lopez għeleb l-isfida tal-favoriti Dillon Cassar ta’ Raptorz Running Club, Charlton Debono ta’ Gozo Athletix u Andrew Grech ta’ Mellieħa AC. L-aħħar erba’ kilometri tat-tellieqa kien kruċjali, b’Lopez u Cassar jissieltu fl-aħħar żewġ kilometri, sakemm Lopez għamel sprint fl-aħħar 60 metru biex kiseb ir-rebħa.
Josann Attard Pulis ta’ Starmax rebħet il-kategorija tan-nisa. Carmen Vella ta’ Mellieħa AC u Caroline Ciappara wkoll ta’ Starmax spiċċaw fit-tieni u t-tielet post. Attard Pulis qalet li għalkemm ma kinitx mistrieħa biżżejjed minħabba l-preparazzjoni tagħhom għall-impenji internazzjonali f’Emiglia-Romagna, din kienet rotta pjaċevoli.
“Kienet tellieqa iebsa mhux biss minħabba t-tlajja li kien fiha imma wkoll għall-isfida li Andrew Grech, Charlton Debono u Pedro Lopez taw it-triq kollha. Konna definittivament qed niġġieldu kważi matul it-tellieqa kollha. Kienet sprint finali li ppermettiet lil Lopez jikseb vantaġġ fuqi, imma madankollu ninsab sodisfatt ħafna bir-riżultat tal-lum,” qal Dillon Cassar.
Id-Direttur tat-Tellieqa Charlie Demanuele wera s-sodisfazzjon tiegħu għal mod kif dawn it-tlielaq qed jikbru. Hu żied li r-rotot jistgħu ma jkunux l-aktar faċli iżda qed jiġbdu l-folol permezz tax-xeni madwar it-tellieqa.
L-edizzjoni li jmiss tal-House of Sport 10k Series se ssir il-Ħadd 1 ta’ Settembru fir-rotta ta’ Burmarrad. Ir-reġistrazzjonijiet se jinfetħu fil-jiem li ġejjin.
