Filwaqt li l-proġett ta’ Reverse Osmosis f’Għawdex hu wieħed bżonnjuż, wieħed irid jara li biex jitwettaq il-proġett, ma tkomplix issir ħsara fil-bajja ta’ Ħondoq ir-Rummien.
Sostnew dan il-Kunsillieri tal-Partit Nazzjonalista fil-Kunsill Lokali tal-Qala, Paul Buttigieg u Karl Buttigieg, b’ riferenza għall-proġett tal-Korporazzjoni għas-Servizzi tal-Ilma li qed isir b’fondi Ewropej biex il-bini fejn qabel kien id-distillatur ta’ Ħondoq ir-Rummien, jinbidel f’impjant ta’ Reverse Osmosis.
Il-Kunsillieri ġibdu l-attenzjoni għall-fatt li x-xogħolijiet qed iħallu impatt fuq il-bajja. Tul dawn l-aħħar xhur kif bdew ix-xogħolijiet, beda jintefa’ likwidu abjad fil-bajja li qed iniġġeż il-baħar.
Jidher li dan ma kienx inċident ta’ darba għax il-każijiet komplew jiġu rappurtati matul Frar, Marzu, u issa anki f’April
Problema oħra hi l-istorbju eċċessiv tal-inġenji li qed jintużaw f’dawn ix-xogħolijiet. Il-Kunsillieri jistaqsu jekk dawn ix-xogħolijiet hux ser ikomplu tul ix-xhur tas-Sajf meta l-bajja ta’ Ħondoq ir-Rummien tkun ta’ kuljum ippakkjata bin-nies.
In-nuqqas ta’ prekawzjonijiet waqt it-tlestija tal-proġett qed iħasseb ukoll kumpanniji li jaħdmu fis-settur tad-diving li jinsabu inkwetati dwar l-effett fuq l-ambjent taħt il-baħar.
Il-Kunsillieri tal-PN fil-Qala għamlu numru ta’ talbiet lill-Korporazzjoni għas-Servizzi tal-Ilma sabiex tkun imħarsa l-Bajja ta’ Ħondoq. Talbu fost oħrajn li l-Kunsill Lokali jkun rappreżentat fuq il-kumitat li qed imexxi x-xogħolijiet iżda l-Kunsill qatt ma kien mistieden.
Qalu wkoll li huma talbu lill-Kunsill Lokali jikteb lill-Korporazzjoni sabiex tinvestiga l-effetti li qed ikollhom ix-xogħolijiet fuq il-bajja, iżda l-Kunsillieri Laburisti kellhom pressjoni kbira mill-Gvern biex il-Kunsill iħallu kollox għaddej.
