Justin James Grima ta’ 24 sena minn Ħal Tarxien inżamm arrestat wara li wieġeb mhux ħati li pprova jikkaġuna ġriehi gravi lil żewġ uffiċjali tal-Pulizija.
Huwa kien akkużat bi 12-il akkuża fosthom li pprova jidrob żewġ uffiċjali tal-Pulizija wara li saq il-karozza fuqhom. Kien akkużat ukoll li għamel ħsara fuq vettura tal-Pulizija, li m’obdiex l-ordnijiet tal-Pulizija u li kiser il-paċi pubblika. Il-każ seħħ is-Sibt fi Triq il-Kbira San Gużepp, fil-Ħamrun għall-ħabta tat-3 ta’ wara nofs in-nhar.
Il-Qorti semgħet ix-xhieda tal-Ispettur Pierre Guido Saliba li qal li waqt patrol hu innota vettura bil-ħġieġ kollu tinted u x-xufier ma kienx jidher. Hu talab lix-xufier biex iniżżel it-tieqa u jsegwih sal-garaxx tal-Pulizija. Spjega li min-naħa tiegħu l-akkużat sfida l-ordni tal-pulizija, ħarab u twaqqaf mill-pulizija aktar tard.
Kien f’dan il-ħin li l-akkużat ħataf b’id waħda lis-surġent, għafsu mal-karozza u bl-id l-oħra beda jsuq. L-Ispettur kompla jgħid li l-akkużat qalilhom li kuġinuh diġa’ tajjar pulizija, u allura hu ma kien se jiddejjaq xejn itajjar tnejn.
Iż-żagħżugħ kien arrestat u fid-Depot qajjem kommossjoni sħiħa. Id-difiża talbet għall-ħelsien mill-arrest, talba li għaliha l-prosekuzzjoni oġġezzjonat.
Il-Qorti ppreseduta mill-Maġistrat Simone Grech ċaħdet it-talba għall-ħelsien mill-arrest. Id-difiża tmexxiet mill-avukati Dr Franco Debono u Dr Amadeus Cachia.
