Illum wasalna fit-tielet u l-aħħar jum tal-għadd tal-voti tal-Kunsilli Lokali, b’kollox hemm 23 lokalità x’jiġu deċiżi.
21.48 Sa fl-aħħar il-proċess tal-għadd tal-voti tal-Elezzjonijiet ta’ nhar is-Sibt 25 ta’ Mejju uffiċjalment wasal fi tmiemu. Grazzi talli segwejtuna.
21.36 Il-Partit Laburista żamm il-maġġoranza tal-Kunsill Lokali ta’ Ħal Qormi minkejja li l-kandidat Nazzjonalista Jerome Caruana Cilia kiseb l-akbar ammont ta’ voti. Is-Sindku il-ġdid elett huwa Renald Falzon f’isem il-PL.
21.26 Anne Marie Muscat Fenech Adami konfermata Sindku tal-lokalità tan-Naxxar hekk kif il-PN żamm il-maġġoranza f’dan il-Kunsill Lokali.
21.20 Stefan Cordina ser jerġa jkun is-Sindku f’Ħ’Attard hekk kif il-Partit Nazzjonalista żamm il-maġġoranza f’dan il-Kunsill Lokali. Stefan Cordina jidher li kiseb rekord personali tiegħu hekk kif kiseb xejn inqas minn 2,843 vot.
21.11 Mill-ewwel indikazzjonijiet jidher li l-PN mistenni jżomm il-maġġoranza fin-Naxxar filwaqt li l-PL mistenni jżomm il-maġġoranza f’Ħal Qormi.
21.04 Konfermata r-rebħa tal-Partit Laburista u Sindku ġdid fil-Kunsill Lokali tal-Mosta. Dan minkejja li Keith Cassar ġab l-aktar ammont ta’ voti għan-nom tal-Partit Nazzjonalista. Flimkien miegħu ġew elett f’isem il-PN; Frans Deguara, Angele Rapa, Joseph Gatt, Aiken Zerafa u Mikhail Micallef.
20.56 Il-Partit Laburista żamm il-maġġoranza fil-lokalità ta’ Santa Luċija hekk kif Charmaine St. John ġiet eletta Sindku. Għall Partit Nazzjonalista ġie elett Liam Sciberras.
20.49 Kurstein Sant huwa s-Sindku l-ġdid tas-Siġġiewi għan-nom tal-Partit Laburista. Il-PL irnexxielu jikseb il-maġġoranza ta’ din il-lokalità b’differenza ta’ 70 vot. Dan kollu minkejja li Alessia Psaila Zammit u Julian Borg kisbu l-aktar ammont ta’ voti għall-Partit Nazzjonalista. Flimkien magħhom ġiet eletta Francine Farrugia.
20.39 Il-Partit Laburista żamm il-maġġoranza fil-Kunsill Lokali tal-Ħamrun bi Christian Sammut jiġi elett Sindku. Għall-Partit Nazzjonalista ġew eletti Efrem Buttigieg u Louise Portelli (Tedesco).
20.35 Romilda Baldacchino Zarb hija s-Sindku l-ġdid tal-Mosta għan-nom tal-Partit Laburista. Dan minkejja li Keith Cassar, għan-nom tal-Partit Nazzjonalista, ġab l-aktar voti.
20.31 Jidher li l-Partit Laburista kiseb il-maġġoranza tal-voti mitfugħa fil-lokalitajiet tal-Mosta u s-Siġġiewi.
20.28 Il-Partit Laburista żamm il-maġġoranza fil-lokalità ta’ Ħal Safi hekk kif Johann Mula ġie elett Sindku. Għall-Partit Nazzjonalista ġew eletti Joanna Abdilla u Pupull Abdilla.
20.21 Il-Partit Nazzjonalista żamm il-maġġoranza u għandu Sindku ġdid f’Ħal Għargħur. Helen Gauci ġiet eletta Sindku filwaqt li ġie elett l-iżgħar kandidat s’issa f’din l-elezzjoni. Fl-età ta’ 16-il sena Abraham Aquilina ġab l-aktar voti fejn flimkien miegħu ġiet eletta ukoll Marilena Gauci. Il-PN kiseb maġġoranza ta’ 54.4%
20.20 Il-Partit Laburista żamm il-maġġoranza fil-lokalità ta’ Ħal Luqa hekk kif John Schembri ġie elett Sindku. Għall-Partit Nazzjonalista ġew eletti Frederick Aquilina u Victor Caruana.
20.09 Mill-ewwel indikazzjonijiet jidher li hemm taqtiegħa intena għall-maġġoranza fil-Kunsill Lokali tas-Siġġiewi.
19.58 Il-Partit Laburista żamm il-maġġoranza fil-Kunsill Lokali tal-Gżira. Conrad Borg Manchè ġie konfermat Sindku tal-Lokal. Għan-nom tal-Partit Nazzjonalista ġew eletti; Jeremy Cardona, Hugh Caruana, Shaun Farrugia u Jessica Borg.
19.57 Terence Agius elett Sindku hekk kif il-Partit Laburista żamm il-maġġoranza f’Ħal Kirkop. Għall-Partit Nazzjonalista ġew eletti John Luke Cassar u Cody Galea.
19.56 Il-Partit Laburista żamm il-maġġoranza fil-lokalità tal-Qala. Paul Buttigieg ġie elett Sindku għan-nom tal-PL. F’isem il-PN ġew eletti Karl Buttigieg u Valerie Cassar Mejlak.
19.53 Daniel Attard konfermat Sindku tal-Imtarfa f’isem il-Partit Laburista. Għall-Partit Nazzjonalista ġew eletti kunsilliera Simon Paul Fenech u Anton Mifsud.
19.51 Konfermat ir-riżultat fiż-Żebbuġ, Għawdex – madanakollu ma nkisbet l-ebda maġġoranza. Għaldaqstant is-sindakat f’dan il-lokal mistenni jiġi deċiż fil-jiem li ġejjin. Għall-PN ġew eletti Daniel Cordina u Baskal Saliba.
19.40 Il-Partit Nazzjonalista żamm il-maġġoranza fil-lokalità tas-Swieqi hekk kif Noel Muscat ġie konfermat Sindku.
19.37 Sindku ġdid għall-Kunsill Lokali tax-Xgħajra hekk kif Neil Attard ġie elett Sindku wara li l-Partit Laburista żamm il-maġġoranza f’dan il-lokal. Għall-Partit Nazzjonalista ġiet eletta Doris Borg.
19.17 Davina Sammut Hili ġiet konfermata Sindku tal-Floriana hekk kif żamm il-maġġoranza l-Partit Laburista. Għan-nom tal-Partit Nazzjonalista ġew eletti l-kunsilliera James Aaron Ellul u Justine Palmier.
19.15 John Boxall għal darb’oħra ġie elett Sindku fil-lokalità tal-Birgu hekk kif il-Partit Laburista żamm il-maġġoranza f’din il-lokalità. Għall-Partit Nazzjonalista ġie elett Anton Gellel.
19.13 Kemm Mosta, kif ukoll Ħamrun, Ħ’Attard, Naxxar, Imtarfa u Birgu jinsabu magħluqa u daqt ikollna riżultat.
18.57 Il-Partit Laburista żamm il-maġġoranza fil-lokalità tal-Isla. Clive Pulis huwa s-Sindku elett għan-nom tal-PL. Il-Kandidat elett għall-Partit Nazzjonalista huwa Malcolm Gatt.
18.53 Mill-ewwel indikazzjonijiet jidher li l-PN ser iżomm il-maġġoranza wkoll fil-lokalità ta’ Ħ’Attard.
18.52 Il-Partit Nazzjonalista żamm il-maġġoranza fil-Kunsill Lokali f’Ta’ Kerċem bis-Sindku Elett Mario Azzopardi.
18.51 Mill-ewwel indikazzjonijiet jidher li l-lokalità tal-Mosta hija waħda missielta.
18.46 Sindku ġdid għal-lokalità tal-Munxar hekk kif il-Partit Nazzjonalista rebaħ il-maġġoranza f’din il-lokalità. Is-Sindku għan-nom tal-PN huwa Damien Spiteri.
18.36 Ta’ min wieħed jinnota li s-Sindku rikonfermat ta’ San Lawrenz Noel Formosa, għada jagħlaq xejn inqas minn 25 sena mill-ewwel darba li kiseb din il-kariga.
18.34 Mill-ewwel indikazzjonijiet jidher li l-Partit Laburista jinsab favorit li jikseb il-maġġoranza fil-lokalità tas-Siġġiewi.
18.31 Il-Partit Nazzjonalista żamm il-Kunsill Lokali ta’ San Lawrenz hekk kif Noel Formosa ġie konfermat Sindku f’isem il-PN. Il-Partit Nazzjonalista kiseb 70.2% tal-voti.
18.22 Mill-ewwel indikazzjonijiet jidher li qed nersqu viċin l-ewwel riżultati hekk kif numru ta’ lokalitajiet hekk meqjusa żgħar huma lesti u qed jiċċekkjaw in-numru ta’ voti nvalidi.
17.30 Ftit tal-ħin ilu ingħata bidu għall-proċess tal-iscanning tal-poloz tal-voti.
