Il-kandidat għall-kariga ta’ President tal-MFA Chris Bonett beda jippreżenta l-viżjoni tiegħu għall-futbol Malti lill-klabbs u l-assoċjazzjonijiet membri. It-tema tiegħu hi Klabbs fuq Nett u fil-jiem li ġejjin se tkun qed tiġi spjegata l-viżjoni tiegħu lill-media biex jitwassal lill-pubbliku.
Wara waħda minn dawn il-laqgħat li kienu deskritti pożittivi u interessanti, Chris Bonett qal li l-programm tfassal wara għadd ta’ laqgħat ta’ konsultazzjoni mal-klabbs involuti. Hu żied li għażel li jibda jiddiskuti dan il-pjan ma’ dawk in-nies li flimkien magħhom irid jitwettaq il-pjan li għandu.
Bonett sostna li hemm għatx kbir ta’ bidla fil-futbol Malti. “Qed nikkontesta biex inġib il-bidla. Ċert li nistgħu niksbu aktar u nemmen li ninsab fl-aħjar pożizzjoni biex inġib il-bidla biex mill-kliem ngħaddu għall-fatti, fejn isiru professjonali u anki nibdew nirbħu. Jekk ma nemmnux ma naslux. Jien nemmen u għandi fiduċja li naslu. Dan jekk jittieħdu deċiżjonijiet li hemm u jitwettqu proġetti ambizzjużi,” qal Bonett.
