Gowl lejn nofs it-tieni taqsima kien biżżejjed biex il-Kosta tal-Avorju tegħleb lill-Afrika ta’ Isfel 1-0. Il-gowl deċiżiv wasal fl-64 minuta meta Max Gradel tefa’ kross preċiż mix-xellug lejn Jonathan Kodija, bil-plejer ta’ Aston Villa jikkontrolla l-ballun biex għeleb lil Ronwen Williams b’xutt fil-baxx. Nicolas Pepe laqat il-lasta fl-ewwel taqsima għall-Kosta tal-Avorju filwaqt li Thulani Hlatshwayo ra d-daqqa ta’ ras tgħaddi fuq il-mimduda għall-Afrika ta’ Isfel meta l-iskor ma kienx għadu nfetaħ.
Minn Grupp E, l-Angola kisbet punt kontra t-Tuneżija fi draw ta’ 1-1. Kienu t-Tuneżini li fetħu l-iskor wara 34 minuta meta ngħataw penalty għal fawl ta’ Paizo fil-kaxxa fuq Naim Sliti. Mill-11-il metru Youssed Msakni ma żbaljax b’xutt b’saħħtu. L-Angola ġabet id-draw fit-73 minuta meta xutt ta’ Mateus ġie salvat parzjalment minn Farouk Ben Mustapha, b’Djalma jkun pront biex xeħet għal ġewwa mill-viċin.
F’logħba oħra mill-istess grupp, il-Mali rebħet 4-1 kontra l-Mauritania. Abdoulaye Diaby fetaħ l-iskor fis-37 minuta b’xutt sabiħ minn barra l-kaxxa, biex Moussa Marega rdoppja minn penalty qabel tmiem l-ewwel taqsima. Adama Traore għamilhom 3-0 fil-55 minuta b’xutt fil-55 minuta mil-linja tal-kaxxa l-kbira. El Hacen El Id naqqas id-distakk minn penalty fit-72 minuta iżda reġa’ kien Adama Traore li skorja r-raba’ gowl tal-Mali bi ġmiel ta’ xutt minn barra l-kaxxa.
Grupp D
Kosta tal-Avorju v Afrika ta’ Isfel 1-0
Grupp E
Tuneżija v Angola 1-1, Mali v Mauritania 4-1
Logħob li jmiss
Grupp F
Kamerun v Guinea-Bassau 7.00pm, Ghana v Benin 10.00pm
