SAN ĠILJAN TUM INVEST…….. 11 SLIEMA FRANK SALT……………. 7
(4-2), (3-2), (2-2), (2-1)
San Ġiljan TUM Invest taw l-ewwel telfa tal-istaġun lil Sliema Frank Salt b’rebħa meritata ta’ 11-7. Il-Ġiljaniżi qatt ma kienu minn taħt fil-logħba u setgħu jikkontrollaw il-logħba. Sliema ma ħallewx impatt fil-logħba tant li ma skorjawx darbtejn wara xulxin biex setgħu jibdlu l-logħba. Meta pruvaw jagħmlu dan, sabu lill-gowlkiper ta’ San Ġiljan Jake Tanti li salva lit-tim tiegħu f’diversi okkażjonijiet.
B’din ir-rebħa, San Ġiljan se jibdew it-tieni fażi fil-Kampjonat Premier b’erba’ punti filwaqt li Sliema se jibdew bi tliet punti. Dan dejjem jekk Exiles iżommu mal-previżjoni u jegħlbu lil Birżebbuġa hekk kif il-Kampjonat Premier ikompli bil-konfronti diretti biss.
Matthew Zammit spikka fl-ewwel sessjoni hekk kif skorja tripletta (tnejn minnhom minn penalties), b’San Ġiljan jirbħu l-ewwel sessjoni 4-2. Għal Sliema Mark Meli kien ġab id-draw momentarju u Gavril Subotic naqqas id-distakk.
Fit-tieni sessjoni spikka l-veteran Paul Fava li skorja żewġ gowls mill-isbaħ flimkien ma’ gowl ta’ Andreas Galea. Sliema fuq in-naħa l-oħra kienu kostretti jiġru wara r-riżultat iżda meta bdew inaqqsu r-riżultat, San Ġiljan bdew iwieġbu mill-ewwel.
Wara li Niksa Dobud wieġeb għall-gowl ta’ Gavril Subotic, Jamie Gambin fetaħ il-logħba b’gowl mill-viċin lejn tmiem is-sessjoni. Iżda l-Ispanjol Guillermo Molina kellu ħsibijiet oħra u kabbar id-distakk għal tliet gowls bl-aħħar xutt tas-sessjoni.
Molina prattikament temm it-tamiet tas-Slimiżi b’penalty fil-bidu tal-aħħar sessjoni. Jerome Gabarretta skorja gowl ta’ konsolazzjoni għal Sliema mill-viċin lejn nofs is-sessjoni, b’Niksa Dobud jissiġilla r-rebħa għat-tim Ġiljaniż f’azzjoni maħduma mill-isbaħ.
San Ġiljan: J. Tanti, B. Grech, A. Galea (2), N. Dobud (2), G. Molina (2), M. Zammit (3), B. Plumpton, K. Dowling, T. Said, Da. Zammit, P. Fava (2), Di. Zammit, T. Micallef, J. Bonavia, A. Saliba
Sliema: J. Parnis, J. Gabarretta (2), G. Subotic (2), J. Sciberras, M. Meli (1), N. Hoznyansky, M. Spiteri Staines, L. Galea, B. Cachia, J. Gambin (1), Z. Mizzi, N. Bugelli (1), M. Vassallo, K. Borg, J. Cachia
Referees: Mario Dalli, Stefano Scappini
