It-telfa tas-Sibt li għadda kontra Sirens, poġġiet lil Neptunes Leo Vegas f’sitwazzjoni li għandhom bżonn rebħa immedjata biex itemmu l-ewwel fażi mal-ewwel tnejn u b’hekk jgħaddu dirett għas-semifinali tal-play-offs. Kontra Sirens b’eċċezzjoni għal ftit minuti, Neptunes kellhom il-vantaġġ sat-tielet sessjoni iżda meta t-tim minn San Pawl il-Baħar mar minn fuq fl-aħħar sessjoni, Neptunes ma rnexxielhomx jirkupraw.
L-avversarji tagħhom Exiles Elia Caterers kisbu punt f’żewġ konfronti diretti kontra Sliema u San Ġiljan iżda dan ma jfissirx li Neptunes se jkollhom logħba faċli, anzi hi logħba delikata. Exiles kellhom vantaġġ sa nofs il-logħba iżda sofrew sitt gowls mingħajr risposta fit-tielet sessjoni u baqgħu ma rkuprawx. Kontra San Ġiljan l-istorja kienet differenti hekk kif wieġbu wara li kienu 4-0 minn taħt fl-ewwel sessjoni u salvaw punt fl-aħħar sessjoni minkejja żvantaġġ ta’ erba’ gowls.
Mill-Ewwel Diviżjoni, Birżebbuġa Freeport jibdew favoriti kontra Ta’ Xbiex Amigos. Birżebbuġa kellhom ukoll xi prestazzjonijiet sodisfaċenti kontra avversarji aktar kwotati minnhom fir-rawnd preliminari.
Ta’ Xbiex għandhom skwadra żagħżugħa ferm ibbażata fuq plejers ta’ Sliema li ma sabux spazju fl-iskwadra ewlenija. Il-prestazzjoni fl-aħħar logħba tagħhom kontra Marsaxlokk għandha tqawwi qalb il-kowċ Giuseppe Dato li dawn iż-żgħażagħ jistgħu jiksbu xi punti fil-kampjonat.
L-istaġun dieħel fil-fażi li t-timijiet inqasmu f’żewġ kampjonati. Wara r-rawnd preliminari, l-ewwel tliet timijiet minn kull grupp se jilagħbu fil-Kampjonat Premier u l-oħrajn se jkomplu fl-Ewwel Diviżjoni. Fil-logħbiet li jmiss imsejħa cross-over, it-timijiet se jilagħbu kontra t-timijiet tal-istess kampjonat iżda mill-grupp l-ieħor. B’hekk kull tim fil-Kampjonat Premier lagħab żewġ konfronti diretti, l-istess bħat-timijiet tal-Ewwel Diviżjoni bl-eċċezzjoni ta’ Birżebbuġa u Marsaskala minħabba li kienu ħames timijiet fi Grupp A.
Lorincz iħalli lil Birżebbuġa
Għall-partita tal-lum, Birżebbuġa se jkunu mingħajr l-Ungeriż Balint Lorincz li se jirritorna pajjiżu minħabba raġunijiet personali. Ma’ Birżebbuġa, Lorincz lagħab l-erba’ logħbiet tar-rawnd preliminari u skorja disa’ gowls.
Hu għamel id-debutt fil-15 ta’ Ġunju kontra Sliema Frank Salt fejn naqas li jsib ix-xibka u fit-tliet logħbiet l-oħra skorja erba’ gowls kontra Marsaskala, doppjetta kontra San Ġiljan u tripletta kontra Exiles. Postu se jittieħed mill-Kroat Antun Goreta.
Logħob li jmiss
Kampjonat Premier
Illum: Exiles v Neptunes 7.30pm
Għada: Sirens v Sliema 6.45pm, San Ġiljan v Marsaxlokk 8.00pm
Il-Ġimgħa: San Ġiljan v Neptunes 7.30pm
Is-Sibt: Sirens v Exiles 6.00pm, Sliema v Marsaxlokk 7.15pm
It-Tlieta 16 ta’ Lulju: Exiles v Marsaxlokk 7.30pm
L-Erbgħa 17 ta’ Lulju: Neptunes v Sliema 6.45pm, Sirens v San Ġiljan 8.00pm
Kampjonat I Diviżjoni
Illum: Ta’ Xbiex v Birżebbuġa 6.15pm
Għada: Marsaskala v Valletta 5.30pm
Il-Ġimgħa 5 ta’ Lulju: Otters v Marsaskala 6.15pm
Is-Sibt 6 ta’ Lulju: Valletta v Birżebbuġa 4.45pm
It-Tlieta 16 ta’ Lulju: Ta’ Xbiex v Marsaskala 6.15pm
L-Erbgħa 17 ta’ Lulju: Birżebbuġa v Otters 5.30pm
