Il-Perù b’sorpriża mhux biss għaddew għall-finali tal-Copa America iżda għelbu liċ-Ċili bl-iskor ta’ 3-0. Peru mill-ewwel urew l-intenzjonijiet tagħhom peress li skorjaw żewġ gowls fl-ewwel taqsima. Fil-21 minuta kien Flores fetaħ l-iskor għall-Peruvjani, b’Yotun jirdoppja fit-38 minuta.
Eżatt mal-ftuħ tat-tieni taqsima ċ-Ċili fallew ċans li jidħlu lura fil-partita meta ngħataw penalty, imma mill-11-il metru Vargas falla. Minkejja li ċ-Ċili tefgħu kollox fuq l-attakk u ħolqu xi okkażjonijiet biex isibu x-xibka, ma rnexxilhomx, anzi, kienu l-Perù li għalqu l-partita mal-ewwel minuta fuq il-ħin regolamentari permezz ta’ Guerrero.
Il-ġurnata minn filgħodu turik u mill-ħażin marret għall-agħar b’mod speċjali għal Vargas li reġa’ kellu ċans ieħor li jiskorja l-gowl ta’ konsolazzjoni, meta fir-raba’ minuta fuq il-ħin regolamentari ċ-Ċili ngħataw penalty ieħor b’deċiżjoni bil-VAR, imma għal darb’oħra l-plejer Ċilen falla, bir-riżultat finali jibqa’ ta’ 3-0.
Il-Perù issa jiltaqgħu fil-finali tal-Copa America kontra l-Brażil nhar il-Ħadd li ġej, logħba li tibda fl-10.00 p.m. (ħin ta’ Malta). Il-Perù ilhom ma jirbħu din il-kompetizzjoni sa mill-1975, filwaqt li l-Brażil rebħu din it-tazza għall-aħħar darba 12-il sena ilu, fl-2007.
