Libjan ta’ 38 sena kien ikkundannat tliet snin ħabs wara li nstab ħati li seraq handbag ta’ kantanta f’Paceville.
Munir Mohamed Ali Gammudi kien ġie mixli b’dan il-każ … li seħħ fit-18 ta’ Frar ta’ sena ilu. Dakinhar f’Paceville, mal-kantanta Mikaela Attard kien hemm ukoll il-ħabiba tagħha Monica Agius.
Il-każ kien ħoloq furur fuq il-media soċjali, b’Mikaela Attard tikteb illi l-Libjan kien prova joqtolha.
Għalkemm il-Libjan kien akkużat li ipprova jagħti bil-mus lill-kantanta, il-Maġistrat Donatella Frendo Dimech għamlitha ċara li għandha dubji kemm dan kien minnu anke għall-fatt li vittma ta’ aggressjoni b’mus ma ddumx tliet sigħat tixrob fil-post fejn inqabad l-aggressur tagħha.
Fil-fatt, il-Qorti m’emmnitx lit-tfajliet li Munir Mohammed kien ta daqqiet bil-mus fl-istonku ta’ waħda minnhom, u li din ma ġralha xejn għax kellha l-kowt. L-Avukat Ġenerali wkoll kien ta’ din il-fehma, tant li tneħħiet l-akkuża ta’ attentat ta’ qtil.
Il-Qorti qieset iżda li Munir Mohammed huwa riċediv, fejn diġà nstab ħati ta’ żewġ reati oħra. Fir-rigward tas-saħħa mentali tiegħu, il-Qorti qalet li għandu bżonn intervent immedjat għax huwa ta’ theddida għas-soċjetà u għalih innifsu.
Minbarra li bagħtet lil Munir Mohammed tliet snin ħabs, il-Qorti ordnat ukoll il-ħruġ ta’ ordni ta’ trażżin fil-konfront taż-żewġ tfajliet, kif ukoll li jiġi mgħarraf il-Kummissarju għas-Saħħa Mentali.
Il-prosekuzzjoni f’dan il-każ tmexxiet mill-Ispetturi Matthew Spagnol u Nikolai Sant.
//= $special ?>