L-atleta professjonali ta’ Ying Yang Team Noel Shaun Falzon se jkun qiegħed jagħmel ir-ritorn tiegħu fir-ring għada. Falzon ser jirrappreżenta lil pajjiżna fi Sqallija. waqt is-serata Evolution Fight fi Piazza Garibaldi, Rosolini.
Il-kickboxer Malti ser ikun qiegħed iħabbatha kontra Salvatore Cicerone minn Team Muay Thai Mania f’bout ta’ tliet rawnds ta’ żewġ minuti kull wieħed fil-kategorija tal-71 kilogramm. Il-ġellieda mistennija jikkompetu b’regoli tal-K1, fejn jistgħu jagħmlu użu mill-irkoppa.
Din mhux l-ewwel darba li Shaun Falzon irrappreżenta lil Malta kemm f’avvenimenti lokali kif ukoll barra minn xtutna fejn saħansitra diġà kkompeta fi Franza fuq livell professjonali. Wara xi żmien wieqaf, Falzon kien reġa’ beda jitħarreġ b’mod regolari u żgur li mhuwiex wiċċ ġdid għal dawk li jsegwu l-K1 f’Malta. Ir-ritorn ta’ dan l-atleta żgur ser ikun pass interessanti f’din ix-xena sportiva.
