Bulgaru ta’ 63 sena weġġa’ ħafif wara li ntlaqat minn nirien kawża ta’ splużjoni ta’ ċilindru, f’San Pawl il-Baħar.
Il-każ seħħ għall-ħabta tat-3.15pm f’appartament, fi Triq il-Mosta, wara li l-barrani biddel iċ-ċilindru tal-gass.
Minn informazzjoni li kiseb NET News jirriżulta li meta reġa’ daħal fl-appartament, hu xamm riħa qawwija ta’ gass. Għal xi raġuni, hu pprova jixgħel il-forn u kien f’dan il-ħin li seħħet l-isplużjoni.
Kawża ta’ dan, ir-raġel intlaqat bin-nar f’wiċċu, filwaqt li l-ħġieġ ta’ waħda mit-twieqi fil-qrib spara għal nofs it-triq.
Fil-post issejħu l-Pulizija, tim mediku b’Ambulanza u membri mid-Dipartiment tal-Protezzjoni Ċivili, b’dawn tal-aħħar ħadu ħsieb jikkontrollaw in-nar.
Il-Bulgaru ttieħed l-Isptar Mater Dei għall-kura, fejn kien iċċertifikat li qed isofri minn feriti ħfief.
Aktar investigazzjonijiet tal-Pulizija għadhom għaddejjin.
