Ħamruniż ta’ 25 sena ttella’ l-Qorti b’akkużi li kkorrompa tifla ta’ ħmistax-il sena. Hu qed jiġi mixli li wara li f’Lulju kien ingħata l-ħelsien mill-arrest relatati xorta waħda baqa’ jikkuntatja lit-tifla.
Wieħed mix-xhieda, in-nannu tat-tifla stess qal quddiem il-Maġistrat Audrey Demicoli li ra lit-tifla titla’ fuq vann misjuq mill-akkużat. Dan filwaqt li sema’ diversi telefonati li kien jagħmlilha l-istess raġel jheddidha li jekk titilqu joqtolha.
Xiedha oħra kienet ommha fejn saħqet li binha gidbet magħha dwar mobile li kienet qed tagħmel użu minnu biex tikkuntatjah, filwaqt li nstabu diversi ittri li kien jibagħtilha.
L-omm qalet li bintha stqarret magħha li kienet qed tibża’ mill-akkużat minn x’jista’ jagħmlilha.
L-aħħar xhud kienet it-tifla nnifisha fejn qalet li minn mindu r-raġel inħeles mill-ħabs, huma ltaqgħu darbtejn. Madanakollu, waqt is-seduta ħareġ li l-akkużat iltaqa’ aktar minn darbtejn magħha.
Id-difiża ma talbitx għall-ħelsien mill-arrest.
