L-Iskwadra ta’ Kontra d-Droga tal-Pulizija arrestat 25 persuna, Maltin u barranin b’rabta ma’ pussess u traffikar ta’ droga.
Il-ħidma kienet konċentrata fil-limiti tar-Rabat bl-etajiet tal-persuni arrestati tvarja minn 17 għal 42 sena.
Is-sejbiet saru waqt tfittxijiet għal għarrieda waqt attivitajiet ta’ divertiment. Fost id-droga li nstabet kien hemm ħaxixa tal-Kannabis, Kokajina, pilloli Ecstasy u ketamina.
Fost il-25 persuna kien hemm erba’ persuni li ġew arrestati b’rabta ma’ sejba ta’ madwar 50 pillola ecstasy f’ċirkostanzi li juru li kienu lesti biex jiġu traffikati.
Il-persuni huma Serb ta’ 37 sena residenti San Pawl il-Baħar, Russu ta’ 21 sena residenti Gwardamangia, Malta ta’ 28 sena residenti Ħal Qormi u tfajla ta’ 17-il sena residenti Ħal Tarxien.
L-investigazzjonijiet tal-Pulizija għadhom għaddejjin u wħud mill-persuni arrestati mistennija jitressqu l-Qorti fis-sigħat li ġejjin.
