Il-kowċ il-ġdid ta’ Ħamrun Spartans Manuele Blasi kkonferma li l-kampjonat Malti hu aktar diffiċli milli wieħed jaħseb u kompla li mhux se tkun faċli biex jerġgħu jispiċċaw fir-raba’ post. Hu qal dan waqt konferenza stampa fejn ġiet preżentata l-iskwadra Ħamruniża għal dan l-istaġun. Blasi fl-ewwel esperjenza tiegħu f’pajjiżna, se jagħmel id-debutt kontra Gżira United l-Ġimgħa, tim li hu mmexxi mill-eks kowċ ta’ Ħamrun Giovanni Tedesco.
Mistoqsi dwar dan il-fatt, il-kowċ Taljan qal li hu veru li forsi jkollu vantaġġ minħabba li jaf il-plejers iżda żied li fl-istess ħin kull logħba trid tkun milgħuba. Hu jara li l-akbar saħħa tat-tim tiegħu hi l-kollettiv u rringrazzja lill-President Nunzio Antignani u d-Direttur Sportiv tal-opportunità li tawh fejn jittama li jirregala sodisfazzjon f’dan l-istaġun.
Mill-istaġun li għadda, Ħamrun għamlu tmien akkwisti. Dawn huma l-gowlkiper Jean Claude Debattista, id-difensuri Matteo Cinquini u Clayton Failla, il-midfielders Valdo Alhinho, Nicola Leone u l-attakkanti Ailton dos Santos Soares, Lagzir Souflaine u Carlos Manuel Flores.
Il-captain tat-tim Triston Caruana qal li meta jkun hemm bidla ta’ kowċ dejjem ikun hemm mument ta’ tranżizzjoni imma saħaq li issa t-tim qed joqgħod u jinsabu preparati għall-istaġun il-ġdid.
Governucci jgħid li Ħamrun iridu jorganizzaw ruħhom b’mod differenti
Id-Direttur Sportiv ta’ Ħamrun Spartans Antonio Governucci qal li f’dan se jfittxu li jkomplu x-xogħol tajjeb li sar fl-istaġun li għadda iżda fl-istess ħin qal li r-raba’ post miksub fl-istaġun li għadda kien riżultat aktar milli mistenni u għalhekk sostna li jħalli diffikultà biex jerġa’ jkun ripetut.
Governucci kompla li l-pożizzjoni tal-istaġun li għadda tħalli diffikultà biex iżżomm il-bilanċ u żied li l-klabb tal-Ħamrun qed jorganizza ruħu b’mod differenti fejn anki qed jippruvaw itellgħu xi plejers tan-nursery mal-ewwel skwadra. Hu għamel appell lill-partitarji biex ma jikkritikawx biss iżda jagħtu l-appoġġ tagħhom lit-tim.
Preżenti wkoll is-Segretarju tal-klabb Stephen Saliba fejn qal li l-iskop tagħhom hu li jkomplu fejn ħallew is-sena l-oħra. Il-Viċi President Gejtu Debattista kompla li l-iskwadra li għandhom hi kapaċi tikkompeti ma’ fuq.
L-iskwadra ta’ Ħamrun Spartans għal dan l-istaġun
Gowlkipers: Manuel Bartolo, Jean Claude Debattista, Matthias Debono
Difensuri: Darren Borg, Matteo Cinquini, Clayton Failla, Matthew Gauci, Karl Micallef, Orestis Nikolopolous, Karl Schembri
Midfielders: Valdo Alhinho, Conor Borg, Triston Caruana, Marco Criaco, Nicola Leone, Andre Scicluna, Bradley Schembri,
Attakkanti: Ryan Darmanin, Wilfried Domoraud, Carlos Manuel Flores, Ailton Dos Santos Soares, Lagzir Souflaine, Russell Vella
